[A:141]dbang kun dga' bsod nams grags pa rgyal mtshan dpal bzang pos/ rigs kyi bu ngag dbang bsod nams dbang phyug la sogs te rang dang skal ba mnyam pa'i slob ma'i tshogs rnams la phan par bsams nas/ bla ma gong ma rnams kyi gsan yig so so la gzhi byas/ cung zad mi mthun pa dang the tshom gyi gzhir gyur pa rnams bla ma so so'i rnam thar dang / chos 'byung lo rgyus la sogs pa shes byed kyi khungs rnam par dag pa la gtugs te/ rang gi bgrang gzhi bcu phrag bzhi dang nyag ma brgyad du slebs pa/ 'phags pa'i yul na tA ra NaHzhes pa sgrol byed ces grags shing / rgya nag lugs la shing pho spre'u'i lo chu stod zla ba'i dkar po'i phyogs kyi tshes bcu bzhi sngon gyi skyes chen 'khon dkon mchog rgyal po dang / dpal brtse ba chen po kun dga' snying po yab sras sogs dang / phyi rabs bstan pa'i gsal byed dam pa sngags 'chang chos kyi rgyal po la sogs te/ sprul pa'i sku du ma zab mo chos dbyings su mnyam par bzhag pa'i tshul bstan pa'i zla dus kyi dus bzang khyad par can gyi nyin gong ma 'brel tshad don ldan de dag gi dus dran gyi mchod pa 'bul ba'i tshe/ chos grwa chen po dpal ldan sa skya'i bzhi thog bla brang gi tshoms dmar du/ sa gsum gyi bla ma chos kyi rgyal po 'phags pa rin po che'i bzhugs khri padma can gyi drung ga la ba der legs par sbyar ba'i yi ge pa ni skyes sbyangs kyi blo gros rab tu gsal bas/ spyir gsung rab mang po la rnam dpyod kyi snang ba ches cher rgyas shing / khyad par gso ba rig pa'i gzhung lugs dang / yi ge'i