[A:༦༢༢]པར་བྱའོ། །དེ་ཡང་སྔར་ལྷ་སར་བྱོན་པའི་དུས་སུ་དགུང་ལོ་བདུན་ཅུ་ཐུབ་པའི་མཚན་མ་བྱུང་གསུངས་པ་དང༌། དེ་རྗེས་ལན་ཅིག་བདུན་ཅུ་དོན་ལྔ་ཐུབ་པའི་མཚན་མ་བྱུང་གསུངས་པ་དང༌། བླ་མ་ནམ་ཆོས་པ་བདེ་བར་གཤེགས་པའི་ནུབ་མོའི་མནལ་ལམ་དང་བསྟུན་ན། བདུན་ཅུ་དོན་བདུན་པའི་སྟེང་དུ་བདེ་བ་ཅན་དུ་གཤེགས་རྒྱུར་སྣང་ན་ཡང༌། བརྒྱད་ཅུ་གྱ་གཉིས་སམ། འདུལ་བ་པའི་ལུགས་ཀྱི་གྱ་གསུམ་གྱི་བར་དུ་བཞུགས་པ་ནི་གྲུབ་པའི་དབང་ཕྱུག་རྣམས་ཀྱི་མན་ངག་བདུད་རྩི་ལྟ་བུ་སྙིགས་དུས་སུ་མི་ཉམས་པའི་ཆེད་དུ་སྐུ་ཚེའི་འདུ་བྱེད་བྱིན་གྱིས་བརླབས་པར་སྣང་སྟེ། དགུང་ལོ་དོན་གསུམ་བཞེས་པ་འབྲུག་ལོའི་ནང་དུ་དབེན་གནས་བསམ་གཏན་ཕུག་ཏུ་སྐུ་མཚམས་ལ་བཞུགས་པའི་ཚེ། མནལ་ལམ་དུ། ཆོས་རྗེ་ཀུན་དགའ་བཟང་པོའི་ཞལ་ནས། ཨོཾ་མ་ཎི་དྷ་རི་བཛྲི་ནི་སྭཱ་ཧཱ། ཞེས་པའི་སྔགས་གསུངས་ནས་འདིའི་སྔགས་འབྲུའི་གྲངས་དང་མཉམ་པའི་ལོ་གྲངས་ཐུབ་ཅེས་པའི་ལུང་བསྟན་བརྙེས་པར་མཛད་པ་ལས་ཤེས་སོ། །དེ་ནས་དོན་བརྒྱད་བཞེས་པ་བྱ་ལོའི་དབྱར་གླིང་ཁ་བདེ་བ་ཅན་དུ། ཆོས་རྗེ་སྐུ་སྐྱེ་བ་ལ་སོགས་པའི་སྐལ་ལྡན་འགའ་ལ་གསུང་ངག་དང༌། འཁོར་ལོ་བདེ་མཆོག་གི་བསྐྱེད་རྫོགས་ལ་སོགས་པའི་གདམས་པ་མང་པོ་གནང་ནས་དེའི་དགུན་པོ་ངམ་རིངས་སུ་ཕེབས་ཏེ། དགེ་བའི་བཤེས་གཉེན་ཉིས་སྟོང་ལྷག་པ་ལ་ཐེག་པ་ཆེན་པོའི་བློ་སྦྱོང་ལ་སོགས་པའི་གདམས་པ་དུ་མ་གནང༌། དེའི་ནང་ནས་ཟབ་མོའི་ལམ་གྱི་སྐལ་བ་དང་ལྡན་པ་དགུ་བརྒྱ་ལྷག་པ་ལ་གསུང་ངག་རིན་པོ་ཆེ་ཆ་ལག་དང་བཅས་པས་སྨིན་པར་མཛད་ནས་ཁྱི་ལོ་ས་ག་ཟླ་བའི་ནང་དུ་མུས་སུ་ཕེབས། དེ་ནས་བཟུང་སྟེ་བདེ་བར་མ་གཤེགས་ཀྱི་བར་བདེ་བ་ཅན་དང༌། བདེ་ལྡན་རི་ཁྲོད་དང༌། གླེ་ལུང་རྣམས་སུ་བཞུགས་ནས། བདག་ཆེན་བློ་གྲོས་དབང་ཕྱུག་པ་དང༌། སྲས་ཀྱི་ཐུ་བོ་གུང་རུ་ཤེས་རབ་བཟང་པོ་ལ་སོགས་པ། སྟོད་མངའ་རིས། སྨད་མདོ་ཁམས། བར་དབུས་གཙང་གི་དགེ་བའི་བཤེས་གཉེན་མཁས་བཙུན་དད་ལྡན་དཔག་ཏུ་