[A:༦༢༦]སྤངས་པར་འགྲོ་དབང་ཡོད་པ་ཡིན། གང་ལྟར་ཡང་ཐོག་མ་མེད་པ་ནས་ལུས་ཇི་སྙེད་ཅིག་བླངས་ཀྱང་ད་ལན་གྱི་ལུས་འདི་ལས་དོན་ཆེ་བ་མ་བྱུང་འདུག་གསུངས་པ་སོགས་ཀྱི་ཐུགས་རངས་པའི་ཞལ་ད་མང་དུ་གནང༌། དྲུང་ན་གནས་པ་རྣམས་ཀྱིས་ད་ལོ་ནག་པོ་རིམ་བཞི་ལ་མི་མང༷་བ༷་དང༌། རབ་བྱུང་བསྙེན་རྫོགས་ལ་སོགས་མང༷་བས་ལན་ནམ་ཞེས་ལྐོག་ཏུ་གླེངས་འདུག་པས་དེ་མ་ཐག་གསན་ནས། དེ་དག་གང་གིས་ཀྱང་མ་ལན། ད་ལོ་མི་སྡོད་པར་ཤེས་ནས་བསྟན་པའི་རྒྱུན་ལ་ཕན་དུ་རེ་སྟེ་གང་ལྕོགས་བྱས་པ་ཡིན་གསུང་བར་འདུག་གོ །དེ་ནས་ཚེས་བརྒྱད་ཀྱི་བར་ཞལ་ད་གཞན་ཆེར་མི་གནང་བར། རེས་སྤྱན་ནམ་མཁའ་ལ་ཅེར་ཏེ་གཟིགས་ནས་འཛུམ་པ་མཛད། རེས་ཕྱག་དང་ཞབས་བཤུད་ཅིང་སྤྲུག་པ་འཁྲུལ་འཁོར་གྱི་རྣམ་པ་མཛད། རེས་སྐུ་ལུས་གར་སྟབས་ཀྱི་རྣམ་པ་མཛད་པ་སོགས་ཉིན་མཚན་ཁོར་ཡུག་ཏུ་ཉམས་ཀྱི་ངང་ལ་བཞུགས། ཚེས་བརྒྱད་ཀྱི་དགོངས་མོ་ཉི་མ་རྒས་ཙམ་ན། སྐུ་ལུས་གནད་བསྲང༌། སྤྱན་བར་སྣང་ལ་གཟིགས། ཕྱི་རོལ་གྱི་སྤྲོས་པ་བཅད་ནས་ཏིང་ངེ་འཛིན་འབའ་ཞིག་ལ་བཞུགས། དེ་ཡང་བདེ་བར་གཤེགས་པའི་ཚུལ་མ་བསྟན་པའི་ཞག་བཞི་ཙམ་གྱི་གོང་ནས་སྐུ་ལུས་བྱིས་པ་ལོ་བཅུ་དྲུག་ལོན་པའི་རྣམ་པ་ཅན། སྤྱན་དཀར་ནག་འབྱེས་ཤིང་སྤྱན་འབྲས་གནག་པ། སྙན་དང༌། ཤངས་དང༌། མཆུ་སྒྲོས་རྣམས་ཤིན་ཏུ་དོད་པ། ཞལ་གྱི་དཀྱིལ་འཁོར་གཉེར་མ་མེད་ཅིང༌། དཀར་ལ་དམར་བའི་མདངས་ཆགས་པ་ཅིག་བྱུང་འདུག་པ་དེ། ཚེས་བརྒྱད་ནས་ཉི་ཤུ་ལྔའི་བར་དུ་ཡང༌། སྐུ་མདངས་དེ་ཁོ་ནའི་ངང་དུ་བཞུགས། དེའི་སྟོབས་ཀྱི་དྲུང་ན་གནས་པ་རྣམས་ཀྱང་བདེ་བར་གཤེགས་པའི་སྣང་བ་མ་བྱུང་ཞིང༌། བྱ་དང༌། རི་དྭགས་ལ་སོགས་པ་རྣམས་ཀྱང་གནས་གཞན་དུ་མི་འགྲོ་བར་ཉེ་འཁོར་དེ་ཉིད་དུ་གནས་པ་དང༌། སྔར་མེད་པའི་དྲི་བཟང་པོ་ཁྱད་པར་ཅན་གྱིས་གཟིམས་ཁང་གི་ནང་རྒྱུན་དུ་ཁེངས་པ་བྱུང་འདུག་གོ །དེ་ནས་ཉི་ཤུ་ལྔའི་ཉིན་དབུ་ཕྲག་པ་གཡོན་ཕྱོགས་སུ་ཅུང་ཟད་ཡོ། ཞལ་མདངས་གློ་བུར་བ་དེ་ཡལ་ནས་སྔར་གྱི་སྐུ་བགྲེས་པའི་ཞལ་མདངས་ཙམ་དུ་སོང༌