[A:༦༢༧]། གནམ་གང་གི་བར་བཞག་ཀྱང་ཁྱད་གཞན་མ་བྱུང་ནས། ན་བཟའ་གཡེངས་པའི་ཚེ་ལུས་གནད་ཞབས་གཉིས་སེམས་དཔའི་སྐྱིལ་ཀྲུང་ལ། པུས་མོ་གཉིས་གཡོན་ཕྱོགས་སུ་ཅུང་ཟད་བསྣོལ། རྟིང་པ་གཉིས་ཀྱི་སྟེང་དུ་འཕོངས་ཀྱི་སྣག་པོ་ཆེ་བཞག །ཕྱག་གཡས་པ་རྡོ་རྗེ་ཁུ་ཚུར་གྱིས་མཆན་ཁུང་གཡོན་ནས་འཁྱུད། གཡོན་པ་སྡིག་མཛུབ་དང་བཅས་ཏེ། དེའི་སྟེང་ནས་དཔུང་པ་གཡས་ལ་འཁྱུད། སྒལ་ཚིགས་དྲང་པོར་བསྲང་བ། རྒྱ་གར་གྱི་གྲུབ་ཆེན་ཨ་ཝ་དྷཱུ་ཏཱིའི་བཞུགས་སྟངས་སུ་འདུག་ཟེར། རྣམ་པར་ཐར་པ་འདི་ལས་དཔགས་ན། ཐུགས་བཞེད་བཞིན་སྒྲུབ་པ་མཛད་པ་བྱུང་ན་སྐུ་ལུས་མ་སྤངས་པར་མཆོག་གི་དངོས་གྲུབ་བརྙེས་པར་ཞལ་གྱིས་བཞེས་འདུག་ཅིང༌། འོན་ཀྱང་ཐོག་མ་མེད་པ་ནས་ལུས་ཇི་སྙེད་ཅིག་བླངས་ཀྱང༌། ད་ལན་གྱི་ལུས་འདི་ལས་དོན་ཆེ་བ་མ་བྱུང་ཞེས་གསུངས་པའི་ཤུགས་ཀྱིས་བར་དོར་ཕྱག་ཆེན་མཆོག་གི་དངོས་གྲུབ་བརྙེས་པ་གདོན་མི་ཟ་བར་སྣང་ངོ༌། །བདེ་བར་གཤེགས་ཁར་སྐུ་ལུས་ལ་མཚན་དཔེ་ཆ་མཐུན་བྱུང་བ་འདི་ནི། ཆོས་རྗེ་ས་སྐྱ་པཎྜི་ཏ་བདེ་བར་གཤེགས་ཁར་ལིང་ཆུ་རྩེར་ཐོ་རངས་ཤིག་དབུས་སུ་རྗེ་བཙུན་ཆེན་པོ། གཡས་སུ་བིརྺ་པ། གཡོན་དུ་ནག་པོ་པ་བྱོན་པ་གཟིགས་ཏེ། རྗེ་བཙུན་གྱི་ཞལ་ནས་སྐྱེ་བ་གསུམ་པ་ལ་དེ་བཞིན་གཤེགས་པ་དྲི་མ་མེད་པའི་དཔལ་དུ་འགྱུར་བར་ལུང་བསྟན། བིརྺ་པ་དང་ནག་པོ་པ་གཉིས་ཀྱིས་མཐུན་འགྱུར་མཛད། བིརྺ་པས་ཐོད་པའི་བདུད་རྩི་ལ་སྲིན་ལག་གིས་རེག་པར་མཛད་དེ། ཁྱེད་ཀྱི་ལྗགས་རྐྱོང་གསུངས་ནས་ལྗགས་ལ་ཐིག་ལེ་བྱས་པའི་སྣང་བ་བྱུང་བས། དེའི་ཚེ་རྟོག་པ་དང་རྟོག་མེད་མཐའ་ལས་འདས་པ་བདེ་གསལ་མི་རྟོག་པའི་ཡེ་ཤེས། རྒྱལ་བ་རྣམས་ཀྱི་ཐུགས་བརྒྱུད་ལ་ཡང༌། འདི་ལས་ལྷག་པ་མེད་སྙམ་པ་འཁྲུངས། དེའི་ཚེ་གསང་བའི་གནས་སྦུབས་སུ་ནུབ་པ་དང༌། དབུའི་གཙུག་ཏོར་བལྟ་བར་མི་མངོན་པ་སོགས་མཚན་དཔེ་རྣམས་བརྙེས་གསུངས་པ་དང་མཐུན་པར་འདུག་གོ། །།