[A:150b] /lam gyi gegs las thar bar shog /mangga laM bha wantu/ zhes pa de rnams kyi 'phros don cung zad brjod pa bshad zin nas/ de dag gis ni bstan bcos chen po lugs gnyis gsal ba'i nyin byed ma tshang ba med par bstan zin to// //'dir smras pa/ rgyud sde bye ba'i gsang mdzod kun gyi bdag /'khrul med sa skya'i rje btsun mchog rnams kyi/ /gsang sngags zab mo'i bstan 'dzin ngor rdzogs gnyis/ /zhes grags dam pa'i skyes chen rnams la 'dud/ /sngon tshe mang thos dpyod ldan blo gsal rnams/ /gong ma'i gsung rab 'chad nyan sgrub pas brel/ /deng sang dpyod ldan skyes bur rlom rnams kyang / /don med 'dir snang bya bas mi tshe skyel/ /de phyir bdag blo brtson pa'i ded dpon gyis/ /yongs 'dzin mkhas pa'i gru la rten byas te/ /gsung rab rgya mtsho chen por legs zhugs nas/ /legs bshad rin chen len la brtson par gyur/ /ding sang 'di na col chung blun po 'ga'/ /sangs rgyas bstan pa 'dzin pa'i skyes bu las/ /gang dran lag len grol bar rlom pa dag /mtshar du 'dzin pa'i rmongs pa 'ga' med dam/ /de lta na yang rang nyid bstan 'gro'i don/ /rlabs chen bsgrub phyir 'di phyi'i don mtha' dag /yid la re ba ji bzhin kun 'grub par/ /bla mar gsol 'debs kho bo'i dge sbyor legs/ /tshad ldan sa skya'i rje btsun grub mtha'i srol/ /cung zad 'dra min rjes 'jug mkhas pa yis/ /so sor bshad pa'i legs bshad 'di ltos dang / /lugs gnyis bzhed srol mtha' dag rtogs par 'gyur/ /'di sbyar dge bas bdag cag dpon slob