[A:༢༠༡]དེབ་ཐེར་དཔྱིད་ཀྱི་རྒྱལ་མོའི་དབྱངས་འདི་བསྟེན༎
ཐུབ་བསྟན་ཀུན་གསལ་མཛེས་མའི་ཁོར་ཡུག་ཏུ༎
རུང་མཐུན་གོས་ཀྱིས་ཐུན་མཚམས་ཟོལ་བསྟེན་ནས༎
ངེས་གསང་ཐེག་པའི་ཡང་རྩེ་སྔོ་སྐྱེས་འབྲས༎
ཡོངས་སྨིན་གང་བུ་རྒྱས་པའི་གཡུར་ཟ་ལྡེམ༎
དེ་ལྟ་ན་ཡང་ངེས་པ་ལྔ་ལྡན་གཟུགས༎
བཤེས་གཉེན་དམ་པའི་ཨཱ་དཪྴ་ཡི་ངོས༎
ཟློས་གར་བསྒྱུར་བའི་དྲིན་ལས་རིག་པའི་གནས༎
སྨྲ་ཚེ་དབྱངས་ཅན་དགྱེས་པའི་འཛུམ་གྱིས་བསུ༎
ལྷག་བསམ་རབ་དཀར་དྲི་བྲལ་ཡིད་ཀྱི་མཁར༎
བསྟན་བཅོས་ཆུ་ལྷའི་བུ་ཡི་པུསྟ་ཀས༎
སྐྱེ་རྒུའི་ཉོན་མོངས་འདུ་བ་འཁྲུགས་པའི་ནད༎
ལེགས་བཤད་ཆུ་ཀླུང་དྭངས་པོས་དྲུངས་འབྱིན་ཅིང་༎
འཛམ་བུའི་ལང་ཚོ་དར་བབས་འཁྲི་ཤིང་གིས༎
ཉེར་མཚོན་ཡངས་པའི་ནོར་འཛིན་སྐྱོང་བ་ཀུན༎
རྩུབ་འགྱུར་དཔལ་གྱི་རྣོ་ངར་རབ་ཞི་ནས༎
དགེ་བཅུའི་ཁྲིམས་ཀྱིས་རྫོགས་ལྡན་འབོད་པར་ཤོག།
ཕན་བདེའི་གདུགས་དཀར་སྲིད་པའི་རྩེ་མོའི་བར༎
ཁོར་ཡུག་གཅིག་ཏུ་ཁྱབ་པའི་ལེགས་པའི་ལམ༎
སྟོབས་བཅུའི་རྩལ་འཆང་རིང་ལུགས་སྙིང་པོའི་བརྒྱུད༎
འགྲོ་བའི་བསོད་ནམས་ཞིང་དུ་འབར་གྱུར་ཅིག།
ཅེས་གངས་རིས་བསྐོར་བའི་ལྗོངས་སུ་མཆོག་གསུམ་དམ་པར་གཏན་གྱི་སྐྱབས་