[A:༥༨༦]༄༅༅། །རྗེ་བཙུན་བླ་མ་མུས་པ་ཆེན་པོའི་རྣམ་པར་ཐར་པ་ངོ་མཚར་རྒྱ་མཚོ་ཞེས་བྱ་བ། དཔལ་ལྡན་བླ་མ་དམ་པའི་ཞབས་ལ་གུས་པས་ཕྱག་འཚལ་ལོ། །རྒྱལ་བ་རྒྱ་མཚོའི་གསུང་རབ་རྒྱ་མཚོ་བློ་གྲོས་རྒྱ་མཚོས་ཡོངས་བཟུང་སྟེ། །རྒྱལ་སྲས་རྒྱ་མཚོའི་སྤྱོད་པ་རྒྱ་མཚོ་བརྩོན་པ་རྒྱ་མཚོས་ལེགས་བསྒྲུབས་པས། །མདོ་རྒྱུད་རྒྱ་མཚོའི་དགོངས་པ་རྒྱ་མཚོ་ལག་ལེན་རྒྱ་མཚོའི་ཚོགས་བཅས་ཀྱིས། །སྐལ་ལྡན་རྒྱ་མཚོའི་དད་པ་རྒྱ་མཚོར་གདམས་པ་རྒྱ་མཚོས་བལྟམས་མཛད་རྒྱལ། །སྐྱོན་མེད་ཡོན་ཏན་ཀུན་གྱི་མཛོད་མངའ་ཁྱོད་ཀྱི་རྣམ་ཐར་མ་ལུས་པ། །གྲངས་མེད་ལྕེ་ཡིས་བསྐལ་པར་བརྗོད་ཀྱང་བས་པར་མི་འགྱུར་དེ་ལྟ་ནའང༌། །བསླུ་མེད་ངག་གི་ཐུན་མོང་གྲགས་པ་ཙམ་ཞིག་འདིར་ནི་བརྗོད་པ་ལ། །ཟོལ་མེད་དད་པའི་ཡིད་ལྡན་དོན་གཉེར་ཚོགས་རྣམས་དགའ་བས་ཉན་པར་གྱིས། །རྒྱལ་བ་ཐམས་ཅད་ཀྱི་མཁྱེན་བརྩེ་གཅིག་ཏུ་བསྡུས་ནས་སྙིགས་མའི་དུས་སུ་གངས་རིའི་ཁྲོད་འདིར་མིའི་གཟུགས་སུ་སྤྲུལ་ཏེ། འགྲོ་བ་རྣམས་ཀྱི་དོན་མཛད་པའི་བདག་ཉིད་ཆེན་པོ་ལྷ་དང་བཅས་པའི་འཇིག་རྟེན་ན། དཀོན་མཆོག་རྒྱལ་མཚན་ཞེས་མཚན་ཡོངས་སུ་གྲགས་པ་དེ་ཉིད་ཀྱི་རྣམ་པར་ཐར་པ་ངོ་མཚར་ཆུ་རྒྱུན་ཞེས་བྱ་བ་ཚིགས་སུ་བཅད་པ་བདུན་ཅུ་པ་ཞིག་སྔར་རྣམ་པར་སྤེལ་བ་ལས། སླར་ཡང་དེ་ཉིད་ཀྱི་དོན་རྣམ་པར་འགྲེལ་པ་ཞིག་གྱིས་ཤིག་ཅེས་ཡུལ་མཆོག་ལ་དད་པ་དང་ལྡན་པ་དག་གིས་བསྐུལ་བའི་ཕྱིར་ན་ངོ་མཚར་རྒྱ་མཚོ་འདི་འབྲི་བ་ལ་སྐྱོན་མེད་དོ། །འདི་ལ་གསུམ་སྟེ། རྩོམ་པ་ལ་འཇུག་པ་ཀླད་ཀྱི་དོན། བརྩམས་པར་བྱ་བ་གཞུང་གི་དོན། རྩོམ་པ་མཐར་ཕྱིན་པ་མཇུག་གི་དོན་ཏོ། །དང་པོ་ལ་མཚན་གྱི་དོན། མཆོད་པར་བརྗོད་པ། བཤད་པར་དམ་བཅའ་བ་དང་གསུམ་ལས། དང་པོ་ནི། རྗེ་བཙུན་བླ་མ་དམ་པ་མུས་པ་ཆེན་པོའི་རྣམ་པར་ཐར་པ་ངོ་མཚར་ཆུ་རྒྱུན་ཞེས་བྱ་བ་ཞེས་པ་སྟེ། རྗེ་བཙུན་དམ་པའི་ཡོན་ཏན་མ་དྲོས་པའི་མཚོ་ལས་བྱུང་ཞིང༌། མཐོང་བ་དང་ཐོས་པ་དག་གིས་ངོ་མཚར་གྱི་