[A:76]#/ /dpal ldan sa skya paNDi ta'i rnam thar kun mkhyen rin chen dpal gyis mdzad pa bzhugs// / /rje btsun bla ma thugs rje chen po dang ldan pa rnams la gus pas phyag 'tshal lo/ /rgyal ba'i sras mchog kun tu bzang po mkha' dang sa snying sgrib pa kun sel byams mgon padma can/ /dpal ldan gsang bdag rdo rje can dang bgegs dgra mi g.yo bcom ldan 'jam dbyangs skye dgu'i yab/ /'khor lo rdo rje sbrang rtsi can dang utpal gyis spras rgyal yum dri med kun nas mdzes rnams dang / /ma lus rgyal ba sras dang bcas pa'i gtsug gi rgyan gyur bla ma'i zhabs la gus pas bdag phyag 'tshal/ /gang zhig mun pa kun nas 'joms byed de bzhin snar ma'i gtso dang rig mchog dbu ma'i gnyen/ /sna tshogs mdzad bdag bstan la rab dga' mig stong ldan pa mkha' lding rgyal mtshan can/ /gang lags de dag dpal ldan yon tan dpag yas nor bu'i mgul rgyan bzang pos legs spras shing / /ma lus dge tshogs byed pa'i gter chen lus can kun gyi rtsa lag khyed la rgyun du mchod/ /bde legs gsung gi 'byor pa thob pa dang / /phan bde zhi ba'i zas kyis mgron bya'i phyir/ /chos rje'i chos tshul ro brgya ldan pa'i gsung / /mdo tsam bka' drin don gnyer bdag gis bsdu/ /'di ltar bcom ldan 'das ye shes rnam par snang mdzad kyi sngon gyi rgyu mthun pa'i smon lam gyis bskrun pa'i zhing gi bye brag shAkya'i gtso bo de'i gdul bar bya ba'i gnas mi mjed kyi 'jig rten zhes grags pa 'di'i khyad par dbus kyi gling chen po bzhi las/ 'dzam bu gling zhes sgrogs pa'i dbus 'gyur gyi tshal/ byang chub snying po rdo rje gdan gyi byang phyogs/ gangs ri dpal dang ldan pas brgyan pa'i khrod/ rab tu rgyas pa'i ku mu da'i tshal