[A:112]nas te dri ma med pa'i mdo dang rgyud dang / slob dpon dpa' bo la sogs pa'i bstan bcos mkhan po mtha' dag gis de'i yon tan dang bsngags pa brjod cing gzhan la rgya cher bsgrags par gsungs la/ 'jam dpal rnam par 'phrul pa las/ dge ba'i bshes gnyen gyis yongs su zin pa'i byang chub sems dpa' ni sa bcu thob par 'gyur te zhes bya ba la sogs pa dang / 'jam dpal byang chub sems dpa'i ting nge 'dzin phun sum tshogs pa de dag thams cad ni dge ba'i bshes gnyen las nges par 'byung ngo / /'jam dpal de ltar na dge ba'i bshes gnyen rnams ni yon tan bsam gyis mi khyab pa dang ldan pa yin no/ /'jam dpal de bas na byang chub sems dpa' de bzhin gshegs pa la bya ba bzhin du dge ba'i bshes gnyen rnams la bsten par bya'o/ /bsnyen par bya'o/ /bsnyen bkur bya'o zhes gsungs la/ de'i yon tan gyi mtha' yang mdo de nyid las/ gang dag dge ba'i bshes gnyen gyis yongs su zin pa/ sngon gyi sbyor ba phun sum tshogs pa/ dge ba'i rtsa ba bskyed pa/ dmigs pa med par spyod pa de dag gis kho bos bshad pa 'di dag gi don shes par 'gyur ro zhes gsungs pa lta bu'o/ /de lta bas na/ khyed kyi legs bshad dri med bsam yas kyis/ /lhar bcas 'jig rten dga' ba'i yid bsrubs pa/ /blo gsal stong gis spobs pas mi spobs mod/ /phyogs tsam bsnyad pas blun po bdag blo tshim/ /bla ma'i rnam thar cung zad brjod pa las/ /byung ba'i dge bas skye bo ma lus pa/ /chags sdang rmongs pa'i mun pas mi brdzi ba'i/ /kun mkhyen gsung gi snang ba thob par shog /bdag cag gi mkhan po 'gro ba ma lus pa'i rtsa lag mtshungs pa med pa'i rin po che ni sbyin bdag mtha' gcig tu nges pa'i mtshan gyis ma bsgribs pa de'i rnam par thar pa'i bye brag mdo tsam zhig bsnyad pa 'di/ chos kyi rgyal po nyid dbu ru'i klungs skyi shod kyi dben gnas