[A:113] #/ /dpal sa skya paNDi ta'i rnam thar gsung sgros ma bzhugs// /bla ma dang 'jam pa'i dbyangs la phyag 'tshal lo/ /gang gi rang bzhin kun nas rnam dag brjod pa'i yul las rab 'das kyang / /smon lam mthar phyin gzhan gyi dbang gis rnam pa sna tshogs kun sprul zhing / /srid zhi'i dbang phyug mgon po de nyid gsum po rang bzhin 'gyur med sku/ /bla ma mchog la gus pas btud nas rnam thar cha tsam bdag gis brjod/ /bdag cag gi bla ma chos kyi rje 'di ni nges par rdo rje 'chang yin mod/ de lta na yang so so skye bor mthong zhing brtags so/ /'on kyang ngo mtshar ba'i rnam par thar pa 'ga' zhig mthong ste/ 'di ltar chos kyi rje 'di dang po yum gyi lhums su zhugs pa'i dus su byang chub sems dpa' yum gyi lhums su zhugs pa'i rmi ltas yum la byung ste/ klu'i rgyal po'i rin po che'i mgo rgyan la sogs pa mig gis kyang bltar mi bzod pa lta bus brgyan pa cig khyod la gnas khang g.yar ba yin zer bas byon pa rmis so/ /lhums na zhugs pa'i dus na yang yum la ldang ba yang ba dang / zo mdog bde ba dang rgyud la ting nge 'dzin bzang po byung / bltams pa'i tshe na yang byang chub sems dpa' bltams pa'i ltas tsho byung / de nas skyed cung zad bsrings te gog thal thub pa'i dus su/ skye ba snga ma'i bag chags sad pa'i stobs kyis saM skr-i ta'i skad du smra ba byung bas/ yum na re 'di rang gu pa gcig 'ong ba lags sam/ gtam go rgyu med pa'i ngag dog mang po zer ba cig gda' zhus pas/ rje pas saM skr-i ta'i skad mkhyen pas khyod kyi bu la gu ba byung dogs med gsung / yang su la phyag mdzub kyis na ga ra dang / lanydza la sogs pa'i rgya gar gyi A li kA li tshang bar