[A:132] slob dpon gyis de yin gsungs/ nag po pas kyang de yin gsungs nas mthun 'gyur mdzad de nas bdag la tshogs kyi mchod pa shoms shig gsungs nas bshams so/ /de nas zab mo'i lam la nan tan du mdzad pa'i stobs kyis gsang ba'i gnas bltar mi mngon pa dang / dbu'i gtsug tor gsal por 'phags pa dang / smin mtshams kyi mdzod spu dung ltar 'khyil ba la sogs pa'i sku yon tan dang ldan par gyur to/ /zla ba bcu gcig pa'i yar tshes bdun la sprul pa'i lha khang na tshogs tshad kyis thos pa'i sgra sna tshogs pa'i rol mo grag /kho bos rgyu mtshan ci lags zhus pas/ khyed thams cad gsol ba 'debs pa la brtson par gyis gsungs/ lam pha rol tu phyin pa'i lugs kyis mgo dang rkang lag la sogs pa bdog pa thams cad btang ba bas kyang dbang bskur ba mchog thob pa'i bla ma la mos gus dang zhabs tog skad cig tsam byas pa bsod nams che gsungs/ yod tshad bla ma rang la phul bas de'i dus su bdag la 'bul rgyu med pas sngon gnas brtan rkang pa bcos pa'i yon du byin pa'i zha phrug gi phyam tshe dmar po so ma legs pa cig yod pa de'i phud phul bas chos rje rang gis bsnams nas yod pa de 'bul dgos snyam byung bas zhal 'dzum pa cig mdzad nas de nga la 'bul mi dgos/ de sngar ngas gyon pa de ka phul ba yin/ kho bo byang chub dam pa brnyes pa'i dus su skyu ru ra lag mthil du bzhag pa bzhin du khyed slob ma rnams kyis zhabs tog ci byas pa thams cad gzigs pa yin/ de'i dbang bskur ba dang sems bskyed zhabs tog ci byas pa thams cad kho bos mthong zhing / rjes su dran pa thams cad dang / reg pa dang / gtam byas pa dang / 'brel pa byas pa thams cad don med par mi 'gyur bar ngan 'gro'i sdug bsngal las grol ba yin/ des na khyod kyis kyang nga'i zhabs tog mang po byas pas dga' ba sgoms shig gsungs/ bdag gis nub gcig srod nas tho