[A:133]rangs kyi cha tshun chod la res sku'i rgyab nas brten/ res sku'i sta zur nas brten pas 'dul ba rgyal mtshan la shog gsungs nas/ dpon mo zo rog tas phul ba'i phyam tshe mdzes pa de khyer la shog gsungs/ bdag la khyod 'di gon 'u cag gnyis tshe snga ma nas 'brel ba mang po yod pa yin gsungs/ khyod dang po nga'i ja 'dren pa byas/ de nas mi nyag 'ga' ru jo 'bum gug shrI'i rtsar brdzangs de la hor gyis ded pa la ma shi bas da lta nga'i zhabs tog mang du byas/ phyi ma la nga'i drung du mi skye ka med yin gsungs/ smal po zla ba'i tshes bcu bzhi'i tho rangs kyi cha la sna tshogs rgyal mtshan dang / rol mo'i sgra dang / glu'i mchod pa sna tshogs dang / sa g.yo ba dang bcas pas zhi bar gshegs par gyur to/ /nyi shu lnga'i nyin par gdung ba zhus pa'i dud pa thams cad kyang 'ja'i rnam par gyur/ rol mo'i sgra mang po yang skye bo'i tshogs pa thams cad kyis thos so/ /gdung yang phal che ba zhig ring bsrel du gyur to/ /rdo rje 'chang dbang chen po la/ /so so skye bor rtog pa 'khrul/ /dung la ser por mthong dang mtshungs/ /mdzad pa mdzad kyin byin gyis rlobs/ /bla ma chos kyi rje sa skya paNDi ta chen po'i rnam par thar pa dang / bde ba nas bde bar gshegs pa'i dus su lung bstan pa'i rtogs brjod cha 'ga' tsam zhig brjod pa/ de nyid kyi zhabs rdul spyi bos len pa'i rdo rje 'dzin pa blo gros rgyal mtshan dpal bzang pos sbyar ba las/ slar yang bla ma dmar ston chos kyi rgyal po/ mkhas pa rgyal ba dpal/ bi ji rin chen grags/ dam pa kun dga' grags/ bar ston rdo rje rgyal mtshan rnams kyis mdzad pa'i rnam thar las don tshang bar bsdus te sgro skur dang bral ba'i rnam thar gsung sgros ma yongs su rdzogs so/ /gsan yig sogs rgyas par dngos grub brnyes pa'i slob dpon rin chen dpal gyis mdzad pa'i rnam thar du blta'o// //