[A:290]/ /oM swa sti/ bla ma dam pa chos kyi rgyal po rin po che'i rnam par thar pa rin po che'i phreng ba zhes bya ba/ dpal ldan bla ma dam pa dus gsum gyi sangs rgyas thams cad kyi sku gsung thugs yon tan phrin las thams cad gcig tu bsdus pa'i ngo bo/ gsol ba btab na 'jig rten dang 'jig rten las 'das pa'i dngos grub ma lus pa stsol bar mdzad pa dmigs pa med pa'i thugs rje chen po dang / mkhyen rab phun sum tshogs pa bla ma dam pa chos kyi rgyal po rin po che'i zhabs la gus pas phyag 'tshal lo/ /gang gi gzi byin nyi ma bye ba'i gzis kyang mtshon par mi nus shing / /gsung dbyangs snyan pa'i dri za'i glu dbyangs kyis kyang mtshungs pa ma lags pa/ /mkhyen pa'i rgya khyon nam mkha'i khyon gyis kyang ni dper mi nus/ /yon tan dang ni phrin las phun tshogs bla ma dam pa'i zhabs la 'dud/ /lha dang lha min mi'am ci dang klu dbang grub pa rigs 'dzin tshogs rnams kyi/ /gtsug gi nor bus gang gi zhabs pad dga' bas gus blangs pa/ /rgyal ba mchog gi cod pan gyis kyang dpal ldan bla ma'i zhabs la gus btud na/ /gzhan gyis smos ci 'tshal zhing spu ldang mchi ma g.yo bas slar yang phyag 'tshal lo/ /gang gi yon tan nam mkha'i khams ltar rab tu dngas shing rgya che la/ /rgya mtsho'i klong ltar shin tu zab cing gting mtha' gzhal bar mi nus pa/ /'phags mchog gis kyang brjod ma nus na bdag lta smos kyang ci 'tshal te/ /'on kyang khyed thugs dang bas bskul nas bdag gis 'dir ni mdo tsam bsdu/ /'dir gzhi dang snying po me tog gis brgyan pa'i 'jig rten gyi khams 'dir/ thub pa chen po rnam par snang mdzad ye shes gangs can mtsho'i rnam par rol pa du mas sems can gyi don mdzad pa ni/ sangs rgyas kyis 'dul ba la sangs rgyas kyi sku du ma dang / byang chub sems dpas 'dul ba la byang chub sems