[A:291]dpa'i rnam par rol pa du ma dang / rang sangs rgyas kyis 'dul ba la rang sangs rgyas kyi sku dang / nyan thos kyis 'dul ba la nyan thos dang / de bzhin du lha dang klu dang mi'am ci'i dbang po la sogs pas 'dul ba de dag tu ston cing / 'khor los sgyur ba'i rgyal po dang / khams kyi rgyal po dang / rgyal phran dang / dmag dpon dang / blon po rin po che dang / dge sbyong dang / bram ze dang / khyim bdag la sogs pas 'dul ba la de dag gi rnam par rol pa du mar bstan nas/ sems can gyi don mdzad pa yin la/ mi mjed kyi 'jig rten gyi khams 'dir ni bskal pa bzang po 'di la sangs rgyas stong gi rnam par sprul nas 'gro ba du ma'i don mdzad pa las/ rtsod pa'i dus 'dir thub pa chen pos/ mi'i dbang po zas gtsang ma'i yum lha mo sgyu 'phrul chen mo'i lhums su 'jug pa dang / bltams pa la sogs pa chos kyi 'khor lo bskor ba'i bar du 'jig rten las 'das pa'i mdzad pa rmad du byung ba bstan nas 'gro ba dpag tu med pa'i don mdzad cing / 'dul ba'i dbang gis mya ngan las 'das pa chen po bstan te sems can bgrang ba las 'das pa grol bar mdzad do/ /de'i rjes su sdud pa po rnams kyis rgyal ba'i gsung rab mtha' dag 'gro ba so so'i bsam pa dang mthun par/ so so'i skad dang yi ge tha dad pa du mas pu stir bris te gnas par mdzad do/ /de nas de dag gi rnam par 'phrul pa mngon par shes pa lnga dang ldan pa rnams dang / lnga rig pa rnams kyis chos kyi phung po ma lus pa'i dgongs pa nges par 'grel pa'i bstan bcos du ma mdzad cing / lha dang klu la sogs pa'i gnas du ma dang / sa'i steng na phal che bar de bzhin gshegs pa'i bstan pa dri ma med pa dar bar mdzad de/ khyad par du 'phags pa klu sgrub dang / 'phags pa lha dang / 'phags pa thogs med dang / phyogs kyi glang po dang /