[A:338]'dri ba dang / gzhan dag la yang rgya cher bsnyad na yang bsod nams kyi phung po bsam gyis mi khyab par 'byung bar shes par bya'o/ /gang gi yon tan thub dbang lta bur dpag par mi nus pa/ /bdag gis 'dir ni gus pas bsten phyir cha tsam brjod pa las/ /'dir ni nongs pa gang mchis bla ma dam pa nyid dang ni/ /lhar bcas 'jig rten kun la bzod par gsol zhing mchis/ /de ltar bdag gis bdag nyid chen po 'phags pa'i yon tan rgya mtsho las/ /byung ba'i rnam thar rin chen phreng ba gus pas 'dir ni bsdebs pa las/ /bsod nams tshogs ni lhun po'i gtos ltar che zhing mtho ba gang bskrun des/ /lus can ma lus lha dang mi yi bla ma sangs rgyas go 'phang thob par shog /bdag kyang skye zhing skye ba thams cad du/ /bla ma dag pa'i zhabs drung skyes gyur nas/ /rnam thar bzang po'i tshogs rnams gus len cing / /bla ma dam pa'i thugs rjes 'dzin par shog /bla ma dam pa'i thugs kyi sras yongs kyi dge ba'i bshes gnyen grags pa 'od zer zhes bya ba dang / bzang po dpal zhes bya bas thag ring po nas bskul nas/ /blo gros dang dpal mtshungs pa med pa/ /gzhon nu shes rab ces bya bas lhan cig byed pa'i rkyen byas te/ bla ma dam pa yun ring du bsten pas yon tan gyi cha ji rigs pa gsal bar mthong zhing / bla ma dam pa la mi phyed pa'i dad pa thob pa dge slong rdo rje 'dzin pa ye shes rgyal mtshan zhes bya bas bla ma dam pa chos kyi rgyal po rin po che'i rnam par thar pa rin po che'i phreng ba zhes bya ba 'di/ chu mo lug gi lo gdu bu'i zla ba'i tshes nyi shu la dpal sa skya'i chos grwa chen por sbyar ba'o//