[A:340]byed cig gsungs nas/ de nas rin po che pas tshe 'di'i sku bsod dang snyan grags thams cad thugs kyis btang nas thugs dam 'ba' zhig mdzad do/ /de yang khong gi sku gsung thugs kyi rnam thar ni/ btsun pa'i phyogs nas so sor thar pa'i bslab bya la nyes byas phra zhing phra bas kyang ma gos pa'i tshod tsam yod/ byang sems kyi bslab pa la gces spras cher mdzad de/
khyad par bdag gzhan brje ba'i byang chub kyi sems mnga' ba'i stobs kyis sems can sdug bsngal dang ldan pa gzigs pa'am/ gsan pa'i dus na rang dbang med pa'i spyan chab 'byung zhing khams 'du ba byung / gsang sngags kyi dam tshig dang sdom pa dang ldan zhing lam rim pa gnyis la thugs dam gyi gtso bor mdzad pas nyin zhag phrugs gcig gi dus thams cad rnal 'byor bcus 'da' ba ma gtogs tha mal pa'i rnam rtog gis thugs brdzi bar mi nus so/ /des na skyes bu dam pa de'i snyan pa'i grags pas sa'i stengs phal cher khyab pa'i stobs kyis ya gi stod gu ge man chad/ma gi mdo khams yan chad kyi blo gros dang ldan pa'i dge ba'i bshes gnyen sde snod 'dzin pa phal mo ches khong gi zhabs kyi padmo la gtugs nas/ rang rang gi rgyud tshod dang 'tsham pa'i chos kyis rgyud tshim par mdzad de/ gnas skabs dang mthar thug gi bde ba la bkod do/ /de rnams kun gyis kyang rin po che ba rdo rje 'chang gi ngo bor mthong ba ma gtogs pa/ bdag nyid chen po 'di'i sku gsung thugs kyi rnam par thar pa la/ blo gzu bos dpyod pa rnams kyis skyon gang yang mthong ma myong ba yin gsungs/ de nas slob dpon dharmA pha la rakShi ta sku 'khrungs nas/ bla ma chos kyi rgyal po'i gsung gis khong gi drung du bzhugs la dbang dang byin rlabs mang du mdzod la bskyong bar zhu gsungs pa'i gsung yig la brten nas/ rin po che pa nyid chos rje khu dbon la mi phyed pa'i 'dun pa mnga' bas gsung bzhin bsgrubs/ de nas gdul bya rnams kyi bsod nams la ma ran pa'i stobs kyis bsnyung ba'i tshul bstan/