[A:51a]rgyan nas / lus can theg pa chen po dang / /
theg pa dman la mos pa dang / /
gnyis ka 'dun bar bya ba dang / /
gdul ba'i phyir na brtan rnams kyi / /
spyod pa bzhi po mdo bzhin du / /
rjes su 'brangs nas bshad pa yin / zhes pas theg chen la mos pa rnams kyi phyir / phar phyin bcu'i ngo bor gyur pa pha rol tu phyin pa'i spyod pa / theg dman mos pa rnams kyi phyir / byang phyogs so bdun gyi bdag nyid byang chub kyi phyogs dang mthun pa'i spyod pa / gnyis ka la mos pa rnams mthus 'dun par bya ba'i phyir mngon shes drug gi rang bzhin mngon shes kyi spyod pa / theg pa gsum ka'i gdul bya smin pa'i phyir / gdul bya smin pa'i thabs dpag tu med pa ston pa sems can yongs su smin pa'i spyod pa ste bzhi / gtsug na rin chen gyi mdo bzhin du bshad do / /
byang sa las kyang / byang chub sems dpa'i spyod pa 'di bzhis ni / byang chub sems dpa'i spyod pa / thams cad bsdus par rig par bya'o zhes so / /
drug pa mi zad pa brgyad cur dbye na dag ldan las / sems [C:69][B:46a]bskyed bsam sbyor lhag bsam dang / /
pha rol phyin drug tshad med dag /
mngon par shes dang bsdu dngos bzhi / /
so sor rig ston tshogs gnyis dang / /
byang chub phyogs mthun zhi gnas sogs / /
gzungs sogs chos kyi mdo bshad dang / bgrod gcig thabs la mkhas pa'o / /
zhes pas sems bskyed pa dang / /
bsam pa dang / sbyor ba dang / lhag pa'i bsam pa dang / pha rol tu phyin pa drug dang / tshad med pa bzhi dang / mngon shes lnga dang / bsdu ba bzhi dang / so so yang dag par rig pa bzhi dang / chos la rton gyi gang zag la mi rton / don la rton gyi tshig 'bru la mi