[A:19b]brtag pa ste / drug tu bsdus nas ston pa tshad ma'i mdo lta bu'am / da'i dgongs 'grel rab tu byed pa ste bdun lta bu'am / brtag pa sde bdun nam / grub pa sde brgyad dam / rjes 'brang bdun la sogs pa'o / /
rab tu byed pa sde bdun ni / gtso bo lus lta bu'i bstan bcos gsum dang / gyes pa yan lag dang [C:25]'dra pa'i bstan bcos bzhi'o / /
dang po ni / dbang po rno 'bring rtul gsum gyis yang dag pa'i shes pa bde blag tu rtogs pa'i thabs ston pa rigs thigs rnam nges rnam [B:17b]'grel gsum mo / /
kha che dzny'a na shr'i na ro / rnam nges tshad ma'i mdo'i dgongs 'grel du mi 'dod kyang de yi lugs ni gsal bar bya / zhes 'byung zhing / slob dpon chos mchog gis mdo'i dgongs 'grel du mdzad pa nyid 'thad do / /
yan lag gi bstan bcos bzhi ni mngon sum le'u las 'phros pa ni med / rang don rjes dpag las 'phros pa gnyis te / phyogs chos khyab pa spyir gtan la 'bebs pa gtan tshigs thigs pa dang / rtogs dka' ba khyab pa'am brtag chos kyi 'brel ba gtan la 'bebs pas 'brel ba brtag pa ste gnyis / gzhan don le'u las 'phros pa rgol phyir rgol rtsod pa dang rgyal pham tshar gcad kyi gnas ston pa rtsod pa'i rigs pa dang / ngag las gzhan blo rtogs pa tha snyad du sems tsam la'ang mi 'gal bar ston pa / rang lus blo sngon 'gro ba yi / /
bya ba mthong nas gzhan la de / /
'dzin phyir gal te blo shes 'gyur / /
sems tsam la yang tshul 'di mtshungs / zhes ston pa rgyud gzhan grub pa dang bdun no / /
de dag la sogs pa rtog ge'i bstan bcos rnams bod rnams mngon pa'i sde snod du smra ba ni mi 'thad de / rtog ge gtan tshigs rigs