[A:243b]rgya mtsho sgrol ba'i gru chen 'di / /
don med chud zos ma byed rin chen grub / /
tshe 'di long med myur du 'jig 'gyur zhing / /
gsad sar khrid pa'i dud 'gro ji bzhin du / /
skad cig re re zhing yang 'chi la nye / /
nges dang 'chi ba soms dang rin chen grub / /
deng bya sang bya'i bsam pa ma rdzogs par / /
gshin rdze 'jigs rung nyam ngas mdun bsus te / /
mal gyi mtha' mar dbugs sdus srog 'chad tshe / /
chos las gzhan gyis mi phan rin chen grub / /
tshe [C:317]'dir mdza' dang mi mdza'i don gyi phyir / /
chags sdang longs spyod gsog cing 'khor bsdus kyang / /
'khor dang longs spyod rjes su mi 'brang bar / /
las 'bras sdug bsngal rang nyid gcig pus myong / /
tshangs pa brgya byin 'khor los bsgyur ba sogs / /
'khor ba'i bde 'bras thob kyang mi brtan zhing / /
shi nas ngan 'gror mi 'gro'i gtol med kyi / /
'khor bas yid 'byung byos shig rin chen grub / /
de bas bdag ni myur du shi [B:211b]'phos te / /
sngon bsags dge ba'i mthu stobs chen po yis / /
dga' ldan skyes nas mi pham mnyes byed cing / /
mi skye'i chos la bzod pa thob par shog /
deng nas bzung ste byang chub snying po'i bar / /
bdag nyid gces par 'dzin dang dngos rnams la / /
bden par 'dzin pa'i rtog pa mi skye bar / /
skyo med gzhan don 'ba' zhig spyod par shog /
ngan song gsum du nyam thag sdug bsngal ba'i / /
sems can gzhan yang sdug bsngal mang ldan pa'i / /
sdug bsngal thams