[A:9] (6) de nas gtad rabs nag po pa dang | (7) legs mthong gnyis kyis bstan pa rim bzhin bskyangs rjes ring zhig lon skabs | yul oTibisha'i rgyal po zla ba bsrung gi khyim du 'jam dpal gyis sprul pa'i dge slong gis theg chen gyi chos bstan | glegs bam zhig kyang bzhag go zhes byung ba mdo lugs pas sher phyin brgyad stong pa dang | sngags pa rnams kyis de kho na nyid bsdus pa yin zer te | 'di skabs sngar ston pas gsungs pa'i theg chen gyi sde snod rnams gnas gzhan na bzhugs pa las ci rigs mi yul du slar yang dar ba'i thog ma yin par gsungs la | dus 'di skor gyi snga phyi ci rigs su dge slong lha chen po dang | bzang po gnyis rim par byung ste | de gnyis kyis log pa'i gzhi lnga sogs bsgrags nas bstan pa la rtsod gzhi bzhag |
de rjes dge slong klu dang | yid brtan pa gnyis kyang rim bzhin byung nas log po'i rjes su zhugs shing bstan pa dkrugs te rtsod pa byung ba nas rim pa bzhin theg dman gyi sde bzhi dang bco brgyad so sor gyes shing dge slong rnams kyang 'bras bu thob pa'ang shin tu nyung ba'i skabs na dgra bcom pa dang | sde snod 'dzin pa'i btsun pa mang po zhig gis theg dman gyi bka' bsdu gsum pa byas te nyan thos sde bco brgyad kyi bstan pa rnam dag tu sgrubs shing | mdo dang mngon pa sngar yi ge ma 'khod pa rnams yi ger bkod cing 'khod pa rnams la dag ther byas so | 'di'i gong zhig tu kha che'i btsun pa chen po gnas brtan 'khor dge slong lnga stong dang bcas byon pa'ang mdo sde pa'i thog ma'o | |
de ltar theg dman gyi bka' bsdu gsum pa byas pa'i 'og zhig na slar yang theg chen gyi chos smra ba'i btsun pa chen po abitarka sogs chos ston pa lnga brgya tsam byon te | gnas tha dad pa nas theg chen gyi sde snod | lang gshegs dang | rgyan stug po bkod pa'i mdo sogs theg chen gyi mdo sde mang po zhig slar yang spyan drangs pa'i tshul gyis dar bar mdzad cing | theg chen sde pa dngos smra'i sems tsam lugs kyang 'di nas byung | de rjes shig nas dpal sa ra ha chen po byon nas dbu ma'i tshul lugs dar bar mdzad | de'i 'og tu slob dpon klu sgrub kyis bstan pa bskyangs te dbu ma lhag par dar bar mdzad pa nas bzung bstan pa 'dzin pa'i skyes chen du ma 'phags yul du rim par byon pa'i re zhig na |
1. rgyal ba'i dgongs pa mthar thug gi nges gsang rnyed cing theg chen gyi mdo sde'i drang nges 'byed pa la mchog tu bsngags pa nges don dbu ma chen po'i shing rta'i srol legs par phye ba'i sa gsum brnyes pa 'phags pa thogs med zhabs pa yang byon pa ste | de yang 'jam dpal rtsa rgyud las | thogs med ces bya'i dge slong ni | | bstan bcos de ni don la mkhas | | mdo sde nges don drang ba'i don | | rnam pa mang po rab tu 'byed | | 'jig rten rig pa ston bdag nyid | | gzhung byed ngang