[A:188] dus tshod tsam na gshis 'od gsal gnug ma chen po'i rang zhal gyi ngang dang gang thugs gnyis med ro mnyam chen po'i tshul du dgongs pa legs mthar phyin pa'i mdzad tshul gnang ste nyid kyi thugs chos dbyings ye shes dam rgya mchog gis rgyas gtab nas bsod nams zhing du re zhig bar bzhugs mthar rnal 'byor dkar dmar gyi cha bgrod pa yang dag pa'i sgo la dpag ste slob bu rtogs pa'i dbang phyug gang dag gis thugs dam legs bkrol gyi mdzad sgo la brten nas sku gdung rin po che'i phung po nyid la longs spyod rdzogs pa'i chas nye bar gsol te rlabs chen gyi mdzad sgos mchod smon sogs gzab ldan bgyid skabs nyin bdun pa'i mtshan mo la sa gzhi ri klung kun la khyab pa'i 'ur sgra dang bcas sa chen po lan gsum du g.yos shing de dag gi bar bar du res 'ga' nam mkha' g.ya' dag pa dang res 'ga' mkha' dbyings thams cad 'ja' 'od kyis khebs bzhin me tog sil ma'i char zim bur 'bebs shing de skabs su rtogs ldan dag gi dag snang gi ltad mo mtshar dgu sna tshogs ngom pa dang sku gdung zhugs 'phreng gis legs bzhu mdzad skabs me rang len byas te ye shes kyi me dpung kha dog sna tshogs pas ngo mtshar ba'i bkod pa 'dra min gyi sgo nas rten dang brten pa'i dkyil 'khor gyi snang cha yang thugs sras dag gis rang blo dang 'tsham par mthong bas dad gus dpag med 'dren bzhin kun gyi mthong snang mnyam por mkha' lam nas 'ja' sprin me tog gi char bsnyon med bcas kyis dge mtshan khyad par ba ches mang po dang ldan pa'i gshegs mchod gdung rten yongs rdzogs kyi bar legs grub mdzad tshul nyid kyi rnam thar rgyas pa gsang rnam bcas la phyi nang gi mdzad sgo bzang po ji skad byung ba ltar lags shing |
khong gi thugs slob kyi gtso bo rnal 'byor gyi dbang phyug mchog gi go 'phang na bzhugs pa wa 'bro mgo'i bla ma ngag dbang chos 'phags rgya mtsho | lha ba bla ma kun dga' dpal ldan | lha bzo bla ma ngag dbang chos 'dzin | khyi lo ma'i bla ma ngag dbang chos 'byor | a skyong rgya bla ma ngag dbang dkon mchog sogs rang lugs kyi gsang chen rdo rje 'dzin pa du ma dang | rdzogs chen dpal sprul | dpyi chen bai ro | gu ru rdo rje | dpal chen rdo rje sogs sngags rnying phyogs kyi skyes chen mang po dang | 'jam mgon kong sprul | bla ma dam pa nor bzang sogs ris med bstan pa'i mnga' bdag phyogs nas phebs pa gang dag gis gtsos slob chen thugs sras mkhas grub gnyis ldan mang po byon zhing de dag ni gtsang pa dge slong gi phyi'i rnam thar mdor bsdus tsam ste gsang ba'i rnam thar ni 'dir ma smos pas logs su yod pa ltar ro | |
gtsang chen gyi rdo rje slob dpon gnyis pa ngag dbang chos kyi 'phags pa |
2. de nas rim par gtsang chen pho brang du sgrub brgyud 'dzin pa'i rdo rje slob dpon gnyis pa ngag dbang chos kyi 'phags pa'i lo rgyus ni | 'di'i 'khrungs yul 'dzi sribs wa 'bro mgo ste yab dgra