[A:244] lo mtshams dam po mdzad | dgung lo zhe bzhir rang dgon du gtsang pa'i rdo rje slob dpon ngag dbang rdo rje bzang po phebs ngos nas dam pa 'di dang nyams len 'dri gtugs kyi bka' mol phan tshun mdzad pas thugs nang ches mthun gyi sgo nas rje bla ma nyid kyis dam pa 'di'i thugs rgyud la dpag na deng dus la ltos pa'i gsang chen sngags kyi nyams len mchog rdo rje slob dpon du 'os shing de 'dra chog nges su thugs thag chod de rje gang gis dam pa 'di gzhan su las che bkur dang bsngags brjod bcas kyis rjes sor gtsang pa'i rdo rje slob dpon du 'dems bsko mdzad pa sogs kyis rang re'i bstan pa la phan thogs kyang byung ba mthun snang mngon gsal ltar ro | |
dgung lo zhe lnga'i dus su dam pa 'dis rang dgon du dgun ngo sogs su thugs dam bcad rgya mdzad cing ston dus sogs su gdul bya gong chog re'i 'gro don legs byed kyi skabs thugs ngor sbyin bdag sogs mkha' khyab kyi 'gro ba kun la phan sems rlabs che ba dang tha mal snang zhen gyi rtse bcil bzhin dag snang lha'i 'khor lo la gsal snang che zhing rang gshis gnyug ma de'i ngang nas skyong thabs mkhas pa sogs kyis gzhan phan bla lhag tu 'phel ba'o | |
dgung lo zhe drug tu khong gi thugs snang ngor rmi lam 'od gsal dang 'dres pa lta bu'i gnas skabs shig na 'jam pa'i dbyangs dngos thub bstan dge legs rgya mtsho'i rnam pa zhig gis nyid la sbyor drug sgom rim yongs rdzogs kyi lung khrid rjes bsngo ba bcas legs par mthar chags su gsungs pa'i 'phro tsam na snang gnas kyi nyams de las 'phral du sad do | |
dgung lo zhe bdun gyi skabs gtsang grwa'i bsrung rim che bar dam pa 'di nyid phebs dus su nyin cig mnyam bzhag gi snang bar nam mkha' g.ya' dag gi dbyings su nyin byed 'od zer ches 'bar ba zhig shar nas 'ong ba de nyid mthar rang dang gnyis med du gyur pa'i thugs nyams byung rjes yun cig nas gtsang pa'i gzims khang bla ma rdo rje bzang pos nyid 'bod mi mngags pa ltar sku mdun du song ba la gzims khang bla ma de nyid kyis | dam pa 'di la che bas gus bkur dang bcas pas gtsang pa grwa tshang yongs kyi mnga' bdag nges don sgrub brgyud kyi bstan pa spel ba'i rdo rje slob dpon mchog tu mnga' gsol gyi bka' nam yang ldog tu med pa legs stsal gyi sgo nas rang gi rgyal tshab tu bka' dbang ji bzhin bskur bar mdzad |
dgung lo zhe brgyad par 'gro 'dul dus su babs pa'i pad ma'i rgyal tshab kyi sprul pa'i gter chen kun bzang chos kyi nyi bka' lung las | shar 'dzambha la yi cod pan du | | rje nag po spyod pa wakka'i ming | | de'i mdzad 'phrin smon log rA dza'i 'phrul | | mi bsod nams kyi ming gis ma bkag na | | chos rang gi bstan pa yang dag spel | | zhes sogs kyi 'gyur med rdo rje'i gter lung zab mos dus su