[A:256] dgos re byung yang slar yang rang re'i bstan pa'i 'dzin bdag tu mi ring bar byon skabs 'grig pas rje mchog sprul nyid rang cag la sgo kun nas bka' drin lhag par che ba zhig ste | de yang skabs gong 'og ci rigs par gtsang pa'i dgon lag rnga yul gyi rtsi nang dgon pa'i don la gtsang pa dang byang bla brang gnyis 'khon pa byung ba slar bsdums kyi dus su gtsang chen sprul pa'i sku 'di nyid kyis chos skyong khyab 'jug chen po dngos bskul mdzad pas skad cig de nyid la chos skyong de'i rang gzugs me stag 'tshubs ma cher 'khrugs kyi ngos nas mu zi'i g.ya' dug mi bzad pa kun nas 'khyug pas khag phan tshun bar gyi gzi ( gzu ) bzhag mi drang ba rnams dang pha rol dgra zla gnag sems can gang dag de 'phral dug grib kyis zin pas sgo gsum myos shing brgyal ba dang pha rol dpung khag gi sgar gyi steng du glo bur gnam lcags ngar ma'i me char dang ser drag bzod par dka' ba'i 'jigs rngam zil chen pos pha rol gyi dregs pa gzhi nas nges par bcom ste rang phyogs kyi rgyal kha chen po'i ngang nas mtshan snyan yongs la khyab pa byung zhing de 'dra'i tshul gzhan du mas kyang rang re'i gtsang pa sgar gyi bstan pa'i sgo kun nas rgyas byed kyi lha bla ma mchog gyur che ba'i mdzad sgo legs par mnga' bzhi yin la | mtshams re zhig nas smad tsha rong phyogs su gtsang chen sku phreng lnga pa'i sku skyes rtags mtshan can zhig legs par 'khrungs pa gdan 'dren gyi dus su babs na gtsang grwa yongs kyis rje mchog sprul 'di 'phrin las dang mtshan snyan kun nas rgyas stabs khong nyid gtsang pa'i sku phreng lnga par gzhir bzhag gi steng nas tsha yul du 'khrungs ba'i sku skyes nyid don la gtsang pa'i thugs sprul du re yul byas te phyi ngor tsam la gtsang pa dge slong gi yang sprul gyi mtshan nye bar gsal bzhin dus mi ring bar 'dzam thang gtsang chen pho brang du khri 'don sogs kyi legs sgo byas shing | de skabs su khong gis thugslegs dgyes kyi ngang sku skyes gzhon pa blus yon gyi dngos rdzas gang dgos sogs thams cad thugs khur bzhes te mdzad sgo kun mthun gyi spyod pa rlabs che ba nye bar gnang la | de nas bzung rim pas rje mchog sprul gong ma nyid la gtsang sku chen zhes pa mtshan chags |
'di skor khong nyid nang thugs kyi mngon par rtogs pa che rab byung zhing rtsa rlung thig le la dbang cher son pa thugs dmigs la nus pa nye bar che ba zhig tu gyur te nyin cig rje mchog gi sprul pa'i sku gang gi drung du a skyong dpon rin chen byams kyi ma rgan lo lon nad kyis gzir ba 'pho lung zhu bar 'ong ba la rje nyid kyis 'pho ba btab pas gson po'i rnam par shes pa skad cig de nyid la gnas dngos su spar bar mdzad pa sogs rlabs che ba'i nus mthu mnga' zhing gzims khang du phur pa'i dung 'khor sogs dung 'khor 'ga' re nyid kyis legs bzhengs mdzad cing | de phyis bar bar rnams su sde dgon rten gsum che ba gang dag la phyag mchod re dang bstan 'gro'i don la mgo log sogs phyogs phyogs rnams la