[A:24] ( spyi lo 1292-1361 ) gang de nyid rang cag gi bsod nams kyis bla ma'i skal bar thob pa 'di ni shin tu ya mtshan pa'i gnas lags te | de yang rnga bo che'i mdo sde sogs las lung bstan pa ni | li tsa bI gzhun nu 'jig rten thams cad kyis mthong na dga' zhes bya ba ma 'ongs pa'i dus na kayori'i rgyud du nga'i ming 'chang ba'i dge slong du gyur te | zhes sogs gsal bar gsungs pa dang | gtsug tor rnam par rgyal ma'i rgyud las | bde gshegs mya ngan 'da' 'og nas | | lo ni stong phrag phyed ring tshe | | gdong dmar yul du nga 'dra ba'i | | bstan pa 'dzin pa'i dge slong zhig | | chu bo ljon shing 'phreng mdzes su | | kayori yi grong khyer du | | yab ni ye shes dbang phyug che | | yum ni tshul khrims rgyan zhes grags | | sras ni sangs rgyas ming can 'byung | | nga yi bstan pa'i rgyal mtshan 'dzug | | chos kyang dung 'bud dar phyar 'gyur | | zhes sogs mdo rgyud du ma nas yang yang lung bstan pa'i kun mkhyen dol po sangs rgyas nyid kyi sku phreng gi mdzad tshul gyis gdul bya legs par skyong ba don dam par na mkha' mnyam gyi zhing du mtha' klas shing ring mo'i dus nas bla med byang chub brnyes zin kyang slar yang zhing 'dir thabs tshul mchog gi ngo mtshar skyes rabs kyis 'gro phan spel tshul yang |
(1) kun mkhyen jo nang pa chen po'i skye rabs |
smras pa | kun gzigs stobs bcu mnga' ba'i gsung gi zil | | nges don 'jigs med gdong lnga'i nga ro can | | sems dpa' chen po mthong na dga' ba'i phul | | rgyal ba'i sras kyi ngang tshul 'chang 'di rmad| |1
theg mchog gsang chen sngags kyi zhing gi gtso | | padma dkar po'i sgyu ma'i rol gar gyis | | rigs can gang dag zag bral zung 'jug tu | | yongs 'phos bde chen sbyin mdzad 'khor lus bsgyur| |2
dpal gyi lhun por ye shes mchog brnyes shing | | rgyal ba'i dgongs bcud zab mo'i gter gyi bdag | | klu sgrub snying po 'dzam gling bstan pa'i rgyan | | mkhas grub yongs kyi gtsug na mngon par mdzes| |3
dri 'dzin dbang po'i bcud len spos ngad ldan | | gang der sems dpa' mchog gi brtul zhugs 'chang | | chos bzang khyad 'phags sher phyin dam pa'i mdzod | | theg chen rigs can kun gyi rab dga' dpal | | 4
bsil ljongs nor 'dzin gzhi 'di'i tha gru kun | | dam pa'i chos kyis dbang bsgyur sa chen skyong | | lha ldan gnas nas srong btsan mdzad bzang gis | | ma lus sa 'di rdzogs ldan gsar pa byas | |5