[A:406] rdo rje'i slob bu drug cu lhag tsam du gyur cing de dag gi nang nas chos tshan re re rdzogs mtshams rnams su dga' ston tshogs kyi mchod pa lhag mgron skabs mkha' 'gro'i sprul pa'i bya rgod slob bu'i grangs dus dus su yod pa sngon lha bzo sang sku bzhugs pa'i dus dang mtshungs shing | gzhan yang bskyed rdzogs kyi rnal 'byor pa mang po la rang rang la nyer mkho'i chos bka' gang dgos gsung tshe 'jig rten chu bur spyan gyis yi ge mi gzigs kyang khrid yig rnams lan cig nyid kyi snyan lam du 'don rjes thams cad thugs la zin nas gsung khrid ji bzhin gnang ba dang | gzhan gto pod sogs yig cha ji ltar yin kyang de lugs ltar thugs zin gyi sgo nas legs par gsungs shing 'don cha phyag len skabs yi ge re rnyed dka' ba gang dag khong gis lan cig bsnyabs pa tsam gyis ji bzhin lon pa dang | slob bu 'gas dngos rdzas bca' lag skung sbed byed pa ji bzhin thugs kyis mkhyen nas mngon gsal du phud pa dang | sgrub khang du thun nang la las ka ci byas mngon sum gzigs pa sogs zla bral gyi ye shes mchog gi spyan mnga' ba zhig go | |
spyir dam pa gang nyid kyi zhal snga nas | khong gi tshul gsungs pas | sngon mgar klong gter chen gyis | kho bo phyag na rdo rje'i thugs sprul du gsungs la | rang gi sems snang la skye sngon jo nang gi thog ma zhang kun spangs thugs rje brtson 'grus yin snyam yod cing | rang gis mngon du gyur pa'i sems gnas lugs kyi gshis na don dam rang byung gi rigs lnga'i zhing khams bye ba rab 'byams kyi bkod pa yongs su rdzogs pa rang chas su bzhugs par mthong zhing | bar 'ga' mkha' dbyings nas gsum ldan tig le'i dbus su mi bskyod pa'i sku bzhugs pa khong gi rtsa dbu ma nas brgyud de lte ba'i rtsa 'khor du drangs pa dang | gang snang thams cad 'phags mchog thugs rje chen po phyag stong spyan stong gi sku'i snang ba sogs ya mtshan dag pa'i snang ba 'ba' zhig gis tha mal 'di snang gi grwa nye bar zum pa'i tshul zhib rgyas su yang yang gsung gnang mdzad kyin 'dug | dam pa nyid sbyangs pa skyabs mgon gyis zhi gnas kyi rtogs pa khong dang mnyam tshul snga mo zhig nas gsung la | sku tshe smad du chu tshan sman legs bsten skabs dam pa 'di dang 'dzam ngos bla ma kun dga' ngag gi dbang po gnyis nyams len bgro gleng gi skal ba byung tshe 'dzam ngos bla ma nyid kyis ngo mtshar ba'i sgo nas dam pa mchog gi thugs la 'khrungs pa'i nyams rtogs gang dag sngags bla ma med kyi 'phags sa thob pa'i rtags su gor ma chag cing rgyud dang mthun nges su 'dug la | khong gi dag snang du'ang dam pa 'di nyid rje jo nang pa chen po'i sku'i rnam par mthong ba sogs kyi che bsngags rgya cher mdzad cing | bar 'ga' khong nyid kyi zhal nas | sngon kun mkhyen rin po che'i nye gnas sangs rin gyi sku tshe gang bor nges don zab mo'i lta grub thugs la 'khrungs pa gang dag kho bos da lam rtogs pa mchog brnyes skabs zhag gsum gyi mnyam bzhag gi dbyings nas