[A:478]
spyir dpal ldan bla ma gang nyid kyi thugs don dam chos sku ni rgyal ba thams cad kyi chos sku dang dbyer med mod kyang kun rdzob gzhan snang gi tshul la 'ba' mda' bla ma dang thugs slob thu bo rnam gnyis te khong rnam gsum rje bdag nyid chen po dang rgyal tshab mkhas grub rnam gsum gyi sprul par grags na don la sangs rgyas byang sems kyi rnam 'phrul bsam las 'das phyir gcig dang du ma cig char ba'i phan tshun thugs rgyud gcig pa dang sku phreng rim byon sna tshogs pa la 'gal ba ji ltar yod de yod mi rigs kyang rang gi rnam par rtog pa'i ngor dpal ldan bla ma nyid la gang ltar yang sngon kun mkhyen jo nang pa chen po'i zhal gyi gdams pa legs mnos dang de lugs kyi smon lam gyi mthu legs grub kyi mdzad sgo zhig ni ches mngon gsal du yod par mthong ste | khong nyid kyi sku tshe 'dir rtog ge ba'i dpyod sgo tsam du ma zad par nges don zab mo'i lta ba nyams len myong rtogs kyis thugs la ji ltar 'khrungs tshul dang | gzhan gdul bya gang dag la de mthun gyi phan sgo re yang cher snyigs kyi dus su nges par byung ba sogs kyis legs par mtshon nus su yod pa'i phyir | de 'dra'i nges pa don gyi bshes gnyen gang des sngon gtsang pa'i gzims khang du bzhugs pa nas sku tshe smad ri khrod 'dir bzhugs pa yan la thugs slob chos thun pa gang dag la dbang lung zab khrid rgyun mkho'i khar dus 'khor dbang chen lan 'ga' re gsungs pa ma gtogs rgyud sde chen po'i dbang bskur dang bka' 'bum gyi bklag lung 'di ltar mdzad ces pa'i rnam grangs ni tho yig sogs kyi khungs ma rnyed pas ji bzhin brjod pa'i rngo ma thogs so | |
de nas dgung lo nga dgur slebs pa'i dus tsam na nyid kyi zhal bzang gi dkyil 'khor skyabs 'og pa gus phran rang gis kyang mjal te gsung gi bdud rtsi legs myong gi skal ba bzang po nye bar thob pa ste | de yang rang cag la sbyor drug gi sngon 'gro las thog ma skyabs 'gro'i khrid gnang ba'i snga nub mor nyid kyi gzims mal du thugs snang la mchod rten che ba legs mdzes shig khong gis bzhengs nas de'i phyogs bzhir dar chen bzhi 'dzugs pa'i legs mtshan byung zhes zer srol yod la de lor nged cag sbyor drug pa lnga tsam la chos khrid kyis re 'dod skong bar mdzad cing 'di dus su ri khrod der dgon khang yang du ma zhig grub ste khong gis phyogs phyogs nas 'ong ba'i slob tshogs kyang mang tsam yod pa las bla ma ngag dkon sogs la lam rim gyi bshad khrid dang | gzhan bskyed rim pa dang rdzogs rim pa 'ga' re yod pa dag la de mthun gyi khrid dmigs dang bogs 'don spong chog gegs sel ngo sprod gang dgos rnams dang khyad par mgo log pa mkhyen ldan dang | rnga ba'i dge slong 'jam shar gnyis la naigu'i dbang lung zab khrid kyang legs gnang mdzad |
dgung lo drug cu par sbyor drug pa 'bo bla ma blo gros rgya mtsho | rong bla byang chub bzang | za la gsung dbyangs gsum dang | spyod 'jug slob gnyer ba mgar bla smon rab | rnga dge 'jam sher