[A:574] sel | | slob dpon gyis ni sdug bsngal gyi | | rgya mtsho'i 'jigs las sgrol bar 'gyur | | zhes sogs de 'dra mang po mdo sngags kyi bka' bstan bcos du ma las byung la | de ltar gang gsungs ltar don la ji bzhin myong bas grub tshul ci rigs sngon byang chub sems dpa' rtag tu ngus khrag dang rus pa dang | rkang sogs kyi lus dang srog gtang ste | byang chub sems dpa' chos 'phags la bsnyen bkur byas pas tshe de nyid la phyag rgya chen po mchog gi dngos grub thob pa dang | NA ro paN chen gyis kyang grub chen te lo pa bsten dus lus srog thed la bor nas dka' ba dpag tu med pa bya dka' ba rnams spyad pas bzhed don grub pa dang | mar pa lo tsAs bla ma NA ro pa chen po sku gshegs zin kyang dad pa'i shugs chen pos btsal nas bla ma dang mjal ba'i lo rgyus dang | rje btsun mi las lho brag mar pa yab yum la bsnyen bkur byas pas don thams cad grub pa dang | bya yul bas spyan snga ba tshul bzin du bsten pas | nang ma gcig la sde snod gsum dang | rgyud sde bzhi'i tshig don ma lus pa thugs la 'khrungs pa dang | bod ljongs kyi chos sde 'bras spungs su bla ma dam pa'i bka' bzhin sgrub pa'i nye gnas shig bla ma grub thob cig gi slob ma nye gnas bka' legs sgrub mkhan zhig kyang bla ma grub thob pa'i sngon lo bcu gcig tsam na grub pa thob song ba dang | jo bo rje bod du bzhugs skabs khong gi thugs slob rnams las nye gnas 'ga' gis dgon par mtshams sgrub mdzad skabs 'ga' zhig gis jo bo nyid la zhabs tog phul bas nyams rtogs bzang rab byung ba'i lo rgyus yod pa dang | bla ma sa skya pa'i dngos slob bka' bzhin sgrub pa 'ga' sku lus de nyid kyis mkha' spyod du gshegs dang | 'ga' zhig la rdzu 'phrul mngon shes sogs khyad 'phags kyi yon tan byung ba'i lo rgyus mang | rang re'i bla ma rje kun dga' snying po'i phyag mdzod kun dga' dpal bzang gis kyang bla ma'i zhabs tog kho na tshe gang bor bsgrubs pas phyag mdzod nyid dus kyi chos dang ldan la nye skabs 'phral du gnas lugs kyi rang ngo zin nas rtogs pa mngon du gyur pa sogs bla ma'i bka' bzhin sgrub pa'i thugs slob rnams la grub 'bras dngos byung gi lo rgyus brdzun med mang po bshad du yod pa ste | tshul de lugs la dgongs nas sngon byon rje btsun mi las | bla ma mtshan ldan zhig la slob ma gus ldan cig gis gsol ba btab na sgom zhor la 'ong | zhes gsungs pa dang | jo bo chen pos kyang | lus ngag yid gsum bla ma'i zhabs tog tu bkol na sgom gyi dmigs pa gzhan nas btsal mi dgos | zhes gsungs pa sogs don la de ltar gnas pa lags |
de lta bu'i bka' drin gzhal du ma mchis pa'i dpal ldan rtsa ba'i bla ma gang nyid kyi gzugs sku tsam mthong ba'i phan yon yang sdong po bkod pa las | dge ba'i bshes gnyen mthong ba ni | | yon tan