R67: དཔལ་ལྡན་བླ་མ་དམ་པ་ཀུ་མ་ར་མ་ཏིའི་རྣམ་པར་ཐར་པ་ངོ་མཚར་བཀོད་པའི་སྤྲིན་གྱི་རྔ་སྒྲ།

  • Pagination (Witness A): 400
[A:400]སྨྲས་མཆོད་པར་བྱེད་ཅིང། ལྷ་རྫས་ཀྱི་བདུག་སྤོས་དང། མེ་ཏོག་མན་དར་བ་དང། མན་ད་ར?དར་བ་ཆེན་པོ་དག་གིས་ཟླ་བ་གཅིག་ཙམ་གྱི་བར་དུ་ཐམས་ཅད་ཀྱིས་མངོན་སུམ་གྱིས་གྲུབ་པར་བཀུར་སྟིར་བགྱིད། བླ་མར་བགྱིད། རི་མོར་བགྱིད་ཅིང་ལྷ་དང་བཅས་པའི་འཇིག་རྟེན་པ་ཐམས་ཅད་ཀྱིས་མཆོད་ཅིང་བསྟོད་པའི་འོས་དམ་པར་བཞུགས་པ་ཡིན་ནོ༎ སླར་ཡང་ལྷ་དང་བཅས་པའི་འཇིག་རྟེན་གྱི་དཔལ་དུ་ཡུན་རིང་དུ་བཞུགས་པར་གསོལ་བ་འདེབས་སོ༎ ཕྱི་ནང་སྣོད་བཅུད་འཇིག་རྟེན་མ་ལུས་པ༎ འཇིག་རྟེན་མེས་པོས་རང་དགར་བྱས་སོ་ཞེས༎ མངོན་པའི་རྒྱལ་སྒྲོགས་པ་མང་མོད་ཀྱི༎ གྲུབ་ཆེན་འདི་འདྲའི་སྐྱབས་གཞན་འགའ་མ་མཆིས༎ དེ་ཕྱིར་བླ་མའི་མཛད་པ་ལས༎ རང་གིས་ཐོས་པའི་ཆ་ཤས་ཙམ༎ གོ་བདེའི་ངག་གིས་བརྗོད་པ་ཡི༎ དགེ་བ་རྣམ་པར་དཀར་སྐྱེས་པ༎ དེས་ཀྱང་སྐྱེ་བ་ཐམས་ཅད་དུ༎ དད་པས་ཡོན་ཏན་མ་ལུས་པ༎ ཇི་བཞིན་བརྗོད་པའི་མཐུ་ཐོབ་ནས༎ ཞབས་རྡུལ་གུས་པས་ལེན་པ་དང༎ དགྱེས་བཞིན་རྗེས་སུ་འཛིན་པར་ཤོག༎ དེ་སྐད་བརྗོད་འདི་ལེ་ལོ་ཡི༎ རྒྱ་མཚོར་བྱིང་ཀྱང་སྐུལ་བྱེད་ཀྱི༎ བ་དན་གཡོ་བའི་དགེ་ལེགས་ཀྱི༎ རྣམ་ཐར་ནོར་བུའི་ཕྲེང་བ་སྤེལ༎ དཔལ་ལྡན་བླ་མ་དམ་པའི་རྣམ་པར་ཐར་པ་མདོར་བསྡུས་པ་ངོ་མཚར་བཀོད་པའི་སྤྲིན་གྱི་རྔ་སྒྲ་ཞེས་བྱ་བ་འདི་ནི། སྒོ་གསུམ་མི་དགེ་བའི་བྱ་བ་རིང་དུ་རྒྱང་བསྲིངས་ཏེ་བླ་མ་མཉེས་པའི་བྱ་བ་འབའ་ཞིག་གིས་དུས་འདའ་བའི་ཉེ་གནས་དཔལ་ལྡན་རྒྱ་མཚོ་ཞེས་བགྱི་བས་ལེགས་པར་བསྐུལ་བའི་ངོར༎ དམ་པ་དེ་ཉིད་ཀྱི་ཞབས་རྡུལ་སྤྱི་བོར་བླངས་པ་ལ་བརྟེན་ནས་རྡོ་རྗེ་འཆང་ཆེན་པོའི་གསང་བའི་མཛོད་དུ་མ་ལ་ལྟ་བའི་སྐལ་བ་དང་ལྡན་ཞིང། རྗེ་དེ་ཉིད་ལ་མི་ཕྱེད་པའི་དད་པ་བརྟན་པོ་ཅན་ཤཱཀྱའི་དགེ་སློང་མཆོག་ལྡན་ལེགས་པའི་བློ་གྲོས་ཞེས་བགྱི་བས་མངོན་བརྗོད་དང་ཚིག་གི་རྒྱན་གྱིས་མ་བཅིངས་པར་གོ་བདེ་བའི་ངག་གིས་བཀྲོལ་ཏེ། དུས་ཀྱི་འཁོར་ལོའི་རྒྱུད་ཀྱི་དགོངས་པས་རྒྱལ་བ་སྐུ་བལྟམས་ནས་ལོ་ཉིས་