[A:425]བླ་མ་དམ་པ་རྣམས་ལ་ཕྱག་འཚལ་ལོ༎
དཔལ་ལྡན་ཨེ་ཝཾ་དབྱེར་མེད་ཟུང་འཇུག་སྐུ༎
བདེ་སྟོང་ལོངས་སྤྱོད་རྫོགས་པའི་གསུང་དབྱངས་ཀྱིས༎
ཐུགས་ཀྱི་གསང་བ་བསམ་གྱིས་མི་ཁྱབ་པར༎
འཁྲིད་མཛད་བླ་མ་རྣམས་ཀྱིས་འདིར་སྐྱོངས་ཤིག༎
སྔོན་གངས་ཅན་གྱི་ལྗོངས་འདིར་རྡོ་རྗེ་འཆང་ཆེན་པོ་ནས་བརྒྱུད་པའི་རིམ་པ་བར་མ་ཆད་ཅིང། ལྷད་མ་ཞུགས་པའི་གདམ་ངག་ཁྱད་པར་དུ་འཕགས་པ་མང་པོ་ཞིག་བྱོན་ཞིང། འགྲིབ་པ་མི་མངའ་བར་བཞུགས་པ་དུ་མ་དག་ལས་ཀྱང། རྣལ་འབྱོར་གྱི་དབང་ཕྱུག་འབིར་ཝ་པ་ལ་རྡོ་རྗེ་བདག་མེད་མས་དངོས་སུ་གདམས་པའི་གཞུང། ལམ་འབྲས་གསུང་མདོ་ཞེས་ཡོངས་སུ་གྲགས་པ་འདིའི་སྒོ་ནས། གདུལ་བྱ་ལམ་ལ་འཁྲིད་ཚུལ་འདི་ཁོ་ན་ཁྱད་པར་དུ་འཕགས་པ་ཡིན་ཏེ། འདི་ནི་སྐལ་ལྡན་ཅིག་ཆར་བའི་རིགས་ཅན་ལྟ་ཅི་སྨོས། སྔར་སངས་རྒྱས་ཀྱི་བསྟན་པ་ལ་འཇུག་ཡེ་མ་མྱོང་བའི་གང་ཟག་སྐལ་བ་དམན་པའི་རིགས་ཅན་ཞིག་ཀྱང། སྤྱོད་པ་རིམ་ཅན་ལ་སློབ་པ་དང། ལྟ་བ་རིམ་ཅན་ལ་སྦྱངས་པ་མཐར་ཕྱིན་གྱི་སྒོ་ནས་འཇུག་པའི་ཚུལ་དང། དོན་དེ་དག་ཀྱང་ཆལ་ཆོལ་དང་ལྷོད་ཡངས་སུ་སོང་བ་མ་ཡིན་པར། སྙན་བརྒྱུད་བཞི་དང། ཚད་མ་བཞིའི་རྒྱ་དམ་པོས་བཏབ་ནས། གཞི་དམ་ཚིག་དང་སྡོམ་པ་ལ་ལེགས་པར་གནས་པའི་སྟེང་དུ། ལམ་རིམ་པ་གཉིས་ལ་ཐུན་བཞིའི་རྣལ་འབྱོར་