[A:481]པས་ཆོས་འཁོར་གྱི་ཡོན་ལ་དམིགས་པའི་ཟླ་ཕོགས་ཆུ་མིག་ཏུ་ཕུལ། སྟོན་ཆེན་གསུམ་ནི་འབྲོང་སྒང་ནས་དང། སེང་གེ་རྩེ་ནས་དང། རྒྱ་གན་པ་གསུམ་གྱིས་མཛད་པ་ལ། མཚན་བརྗོད་འབུམ་གཏེར་རེའི་རྒྱུ་ཚོགས་གང་འགྲོ་ལ་ཆ་བཞག་པ་ཡིན། གཞན་ཡང་འབྲེལ་ཅན་གྱི་བླ་མ་སོ་སོ། དགེ་འདུན་གྱི་སྡེ་སོ་སོ་ལ་སྐུ་སྐལ་སྔར་གྲུབ་པ་དང། ཕྱིས་འགྲིབ་པར་འགྱུར་པ་སོགས་ཞིབ་ཆ་དུས་ཕྱིས་ཀྱི་ཕྱི་མོ་ལ་དགོས་པ་རྣམས་ནི་ལོགས་སུ་ཤེས་པར་བྱའོ༎
འདིར་སྨྲས་པ། ཐུབ་བསྟན་ལང་ཚོ་འབར་བའི་ཀུན་གསལ་གདོང་ཉི་ཟླ་ལྟ་བུའི་སྲོལ་ཆེན་རྣམས་གཉིས་དང།
ལེགས་བཤད་སྐར་མའི་ཚོགས་ཀྱིས་བརྒྱན་གྱུར་ཚེ༎
འཛམ་གླིང་མུན་པར་གྱུར་པའི་སྒོ་སྐབས་ཅི༎
གང་ཡང་འདི་ན་ཉོན་མོངས་པ་དང་རྣམ་པར་རྟོག་པས་དྲི་མར་གྱུར་པ་མིན་པའི་མཆོད་པའི་ཕྲེང་བཟང་པོ༎
ཕན་དང་བདེ་བའི་ལམ་ཆེན་པོར་ནི་གྱ་གྱུ་མིན་པར་འཇུག་བྱེད་དམ་པའི་ཆོས་ཀྱི་ལེགས་སྦྱར་གཏམ་བཟང་པོ༎
འཛིན་འཆང་ཀློག་དང་འཆད་དང་ཀུན་ནས་བྱང་ཆུབ་པར་བྱེད་དེ་ནི་རྒྱལ་དང་དེ་སྲས་དགྱེས་མཛད་ཐབས་ཆེན་པོ༎
རབ་འབར་རྨོངས་དང་ཆགས་ཁྲོའི་དབང་གྱུར་ཉེས་བྱས་མ་ལུས་དུམ་བུར་གཅོད་མཁས་འཁོར་ལོ་ལན་བརྒྱར་བསྐོར་མཛད་དོ༎ སྔོན་བྱོན་ཆེན་པོའི་ལས་སྟབས་སྐྲུན་བྱེད་འབྱོར་པའི་ཚོགས་ལ་གང་འདིས་འགྲན་པའི་ཁེངས་པ་རྒྱས་མིན་མོད༎
དེར་མཛད་ཆོས་ཀྱི་གཏམ་གང་བསྙད་པ་དེས་ནི་འདིར་འབྱུང་གཏམ་ལས?ལ་སྐྲུན་པའི་གོ་སྐབས་ཀུན་བྲལ་བ།
ཕྲ་མོའི་ས་བོན་ལེགས་པར་བཏབ་པའི་རྣམ་དཀར་གྱིས་ནི་ནམ་མཁའི་ཁམས་ཀུན་འགེངས་པའི་དཔག་བསམ་ཤིང་ཆེན་ལྟར༎
སྐྱེས་བུའི་བྱེད་དང་བདག་པོའི་དབང་གྱུར་བྲལ་དང་རྣམ་སྨིན་རྒྱུ་མཐུན་ཚོགས་རྣམས་དེང་འདིར་དགེ་ཞིང་ཤིས་པར་སྦྱོན༎
ཅེས་ཤིང་མོ་ཡོས་ཀྱི་ལོ་ཐུབ་བསྟན་གསེར་མདོག་ཅན་ཞེས་བྱ་བའི་གཙུག་ལག་ཁང་དུ་སྐུ་གསུང་ཐུགས་ཀྱི་རྟེན་དང། དགེ་འདུན་གྱི་སྡེ་སྣོད་རིན་པོ་ཆེ་རྣམ་པ་གསུམ་རྟོག་གེ་དང་བཅས་པའི་ཉན་བཤད་ཀྱི་གྲྭ་ལེགས་པར་ཚུགས་པའི་དུས་