[A:28]so/ /'jig rten la dmigs te shin tu gtsang sbra dang ye shes sems dpa'i bde ba med pa dang / bdag nyid lha'i snyems pa med pa dang / rmad du byung ba'i spyod yul la rkyen gyi rgyu'i rtog pas rab tu spyod pa ni bya ba'i rgyud la bzhugs so/ /sngags dang sbyin sreg dang phye ma dang rkang mgyogs la sogs pa'i dngos grub brgyad spyad pas sgrub par byed pa ni rtog pa'i rgyud la bzhugs so zhes rtog pa'i rgyud logs su phye bas rgyud sde lngar dbye ba ni slob dpon klu sgrub la sogs pa bzhed do/ /yang na kye rdo rje las/ dgod dang blta ba dag gis dang / /'khyud dang de bzhin gnyis gnyis kyis/ /rgyud kyang rnam pa bzhi rnams kyi/ /dgongs pa'i skad ni ma bsgrags pa/ /zhes bzhi gsungs pa'i shugs las bya ba dang / spyod pa dang / rnal 'byor dang / rnal 'byor bla ma dang / rnal 'byor bla med kyi rgyud ces rgyud sde lngar bzhed pa ni slob dpon bha ba'i lha la sogs pa bzhed do/ /yang dpal bde mchog rtsa ba'i rgyud las/ ji srid mdo bya spyod pa ni/ /rnal 'byor gsang mtha'i dbye ba yis/ /sems can mos pa sna tshogs pa/ /de dang de la dga' ba yin/ /zhes mdo sde rtog pa'i rgyud dang / bya ba'i rgyud dang / spyod pa'i rgyud dang / rnal 'byor gyi rgyud dang / rnal 'byor gsang ba dang ste gsang ba 'dus pa la sogs pa dang / gsang ba'i mtha' dpal bde mchog ste rgyud sde drug tu dbye ba ni grub chen nA ro ta pa rjes 'brangs dang bcas pa'i bzhed pa'o/ /gnyis pa ni/ de lta bu'i dbye bsdu'i khyad par de dag las rgyud sde gsum du 'dod pa ni ting nge 'dzin gtso bor gyur pa tsam la