[A:575]lcogs 'bad rtsis bcas de skor zhib pa rang gi rtogs pa brjod pa skye ba phal ba'i rkang 'thung dge sdig 'dren ma'i las kyi yal ga phan tshun tu 'dzings par bde sdug dus kyi rgyal mos re mos su bsgyur ba'i tshul zhes pa rang nyid kyi brtsams chos ta pa'i mthar 'khod pa der gsal bzhin las 'dir smos ma dgos pas de dag gi thos bsam don yod ched du rang gzhan don gnyis bsgrub tshul gyi sarga nyung tsam ste nyer dgu pa'o/ // /slar smras pa/ nyi ma'i gnyen gyi rgyal tshab chos tshul 'dzad med smra ba'i rdo rje slob dpon che/ /du ma'i zhabs kyi padmor gus bsnyen gang thugs yon tan rin chen 'byung gnas las/ /dad gus ku sha'i sdong bus nyer blangs rang nyid blo yi yol gor rim bsags pas/ /don gnyer gdengs can rol pa'i chu gter 'grub 'di sngon bsags skal ba mchog tu go/ gang zhig snying pos dben pa'i nor dag dka' ba du mas 'bad la spro byed na/ /thog mtha' bar gyi dge ba gsum ldan 'chos skyob yon tan du ma'i 'byung gnas che/ /'di dang phyi ma'i gtan bde lhun grub 'byung phyir tshad ldan gcig nas gcig brgyud pa'i/ /khungs 'brel drang po'i rnam thar 'di 'dra dkon pa'i 'du shes bskyed la cis mi brtson/ /ka ye grog dag 'dir snang srid pa 'khor ba'i sdug bsngal na kra'i grong khyer la/ /bsgral nas byang chub rin chen gling du bgrod la dka' ba che snyam gyi nar ma bsgyur bar/ /bla med bshes gnyen ded dpon bzang po gtsug gi rgyan du legs bsten nas/ /brtson 'grus gru chen zung dang don gnyis yid bzhin bsam 'phel rnyed