[A:༨༨] གྲགས་པའི། ཕོ་ཆུང་བ་(ཕུ) གཞོན་ནུ་རྒྱལ་མཚན། པུ་ཏོ་བ་རིན་ཆེན་གསལ། སྤྱན་མངའ་(སྔ) བ་ཚུལ་ཁྲིམས་འབར་དང་གསུམ་ལས། པུ་ཏོ་བ་ནི་བཀའ་གདམས་གཞུང་དྲུག་ལ་འཆད་མཉན་དང་། སྐྱེས་བུ་གསུམ་གྱི་ལམ་རིམ་ལ་སྒྲུབ་པ་ཟུང་འཇུག་ཏུ་མཛད་པས་གཞུང་པ་དང་། སྤྱན་སྔ་བ་ནི་སྒྲུབ་པ་གཙོ་བོར་མཛད་ནས་གདམས་ངག་པ་ཞེས་བྱའོ།
དེ་ལ་གཞུང་དྲུག་ནི། སྐྱེས་ཚོམས་དད་པའི་གཞུང་། ས་རྒྱན་ཏིང་ངེ་འཛིན་གྱི་གཞུང་། སྤྱོད་དུས་(བཏུས) སྤྱོད་པའི་གཞུང་སྟེ་རིམ་པ་ལྟར། སྐྱེས་རབས་དང་ཆེད་དུ་བརྗོད་པའི་ཚོམས་གཉིས། བྱང་ས་མདོ་སྡེ་རྒྱན་གཉིས། སྤྱོད་འཇུག་དང་བསླབ་བཏུས་གཉིས་སོ།
སྐྱེས་བུ་གསུམ་གྱི་ལམ་རིམ་ནི། དལ་འབྱོར་རྙེད་དཀའ། འཆི་བ་མི་རྟག་པ། ལས་རྒྱུ་འབྲས་གསུམ་གྱི་སྒོ་ནས། འབྲས་བུ་ལྷ་མིའི་གོ་འཕང་ཐོབ་པའི་ཕྱིར་དུ་ལས་འབྲས་ཀྱི་སྤང་བླང་ཚུལ་བཞིན་བྱེད་པ་ནི། མངོན་མཐོའི་ཐེག་པ་སྟེ་སྐྱེས་བུ་ཆུང་ངུའི་ལམ། འཁོར་བའི་ཉེས་དམིགས་བསམ་པའི་སྒོ་ནས་ལྟ་བ་བདེན་བཞི་དང་རྟེན་འབྲེལ་བཅུ་གཉིས་རྟོགས་ཏེ། འབྲས་བུ་འཁོར་བ་སྤངས་པའི་མྱང་འདས་ཙམ་ཐོབ་པར་བྱེད་པ་ནི། ཐེག་དམན་གྱི་ལམ་སྟེ་སྐྱེས་བུ་འབྲིང་གི་ལམ། བྱམས་སྙིང་རྗེ་བྱང་ཆུབ་སེམས་ཀྱིས་རྒྱུད་སྦྱངས་ནས་འབྲས་བུ་གཞན་[དོན] དུ་སངས་རྒྱས་ཐོབ་པར་བྱེད་པ་ནི། ཐེག་ཆེན་གྱི་ལམ་སྟེ་སྐྱེས་བུ་ཆེན་པོའི་ལམ་ཞེས་བྱ་བ་ཡིན་ནོ།
ཁ་ཅིག། འབྲོམ་ནས་པུ་ཏོ་བ་ལས་བརྒྱུད་པ་ལ་གཞུང་དང་། དགོན་པ་བ་ནས་སྣེའུ་ཟུར་པ་ལ་བརྒྱུད་པ་[ལ] གདམས་ངག་པ་ཟེར་རོ།
དེ་ལྟ་བུའི་འབྲོམ་དེས། རང་ལོ་སོ་བརྒྱད་པ་ལ་མངའ་རིས་སུ་ཇོ་བོ་རྗེ་