[A:19] der rje blon tshogs pa'i dus su / zhang nya bzang gis snga ma bzhin gsol ba dang / lha sras kyis bka' stsal pa / zhang zer ba bden / nga yang de ltar dgongs pas / zhang blon dag gros bya'o / zhes bka' btsal pa dang / slad kyis rje blon mang po tshogs pa dang / rgyal po bka' stsol du bcug par / nga'i yab mes kyis lha chos mdzad pa zhang ma zhang gis bshig pa de te por ma legs / zhang nya bzang yang 'di skad zer bas / rgya'i lha yang slar spyan drangs / nged rang kyang chos byar rung pas bya gsungs nas / chos bya bar gros 'chams nas / da chos byed pa la mtha' nas 'ongs pa'i rgya gar dang bal po'i mkhan po las / chos mkhas pa'i lo rgyus can su yod dam smra dgos kyi ces gleng pas / rje'i zhal nas / ba lam klags na sba gsal snang yod / de nga'i drung du bos zer bas / pho nya btang te sba gsal snang bos nas spyan sngar mchis te / rgyal pos zhang nya bzang zer ba'ang zhib tu gsungs nas / rgya gar dang bal yul na chos mkhas pa su yod / spyan drongs shig par bka' btsal ba las / gsal snang gis gsol ba / sngon ni rgya gar za hor yul na mchis / da lta ni bal yul na mchis te / sngon za hor gyi rgyal po'i bu / dge slong shanta rakshi ta zhes bya ba gtsug lag la mkhas pa cig mchis lags zhes gsol /
lha sras kyis bka' btsal pa / de mi dgug tu mi rung bas khyod yul du ma 'gro bar bal yul du song la / bal rje la khyod kyis nga'i 'phrin bgyis la / nga yi sgrom bu yang byin te / za hor gyi bandhe de ci 'khugs su bsgrubs la / cha khyer la shog cig ces bka' bstsal pa dang / thal byung du mang yul du mchis te / bka' sgrom yang bal rje la phul nas / mkhan po bod yul du gshegs par gsol te zhus pas / gnang ste slob dpon gyis bal po'i lo tsA ba zhabs 'bring du khrid byon /