[A:20] mang yul du spyan drangs nas / pho brang du pho nya btang te mkhan po mchis par bgyis te / mang yul na mkhan po mchis zhes gsol ba las / nang 'khor lang gro snang ra dang / snyer rtag btsan lhong gzigs dang / sbrang rgyas legs gzigs dang gsum mang yul du bsur btang te / khyod gsum gyis rim gro bgyis la / lha sa dpe dkar {hen khang dpe dkar kyang zer} du chags phob cig ces bka' btsal pa dang bka' las byung pa bzhin / blon po de dag gis bsus nas / zhabs 'bring byas te mchis nas / mkhan po dang nang 'khor lang gro snang ba ni lha sa dpe dkar du bzhag nas / btsan po'i zhal sngar phyag 'tshal du btsas bar ni da rung chos pa bzang ngan ci lags btol ma mchis nas / ra sa dpe dkar du bzhugs su gsol te / gsal snang ni pho brang du mchis te bsnyen bkur bcug pa dang / zhang blon chen po dag gis gsol pa / lho bal gyi bandhe chos log pa dang / ngan sngags phra men gyi bag bgyid dam mi bgyid / dngos la rtogs su btang par gsol pa las / mchis mes lhas kyang zer / sba legs gzigs dang / seng mgo lha lung gzigs dang / sba sang shi gsum btang pas brtag na a tsa ra'i skad ma go / dar tshags sgo bseg gi tshong 'dus na / kha che skyes bzang gi bu A nanta lo tsA slob 'phro la chad pa byung nas tshong byed pa la lo tsA bcol nas A tsarya ci 'dra dris pas / spyod pa legs so cog la mi bya ba med / nyes so cog la mi btang ba med / lhar dkon mchog gsum mchod / gtso bo sems can la phan pa bya zer nas mchis / de rje la gsol nas spyod pa rgya chen por 'chad / thugs 'phrigs bzhes mi 'tshal zhes pa'am / yang na lugs gcig la / ngan sngags phra men mi mthun pa'i phyogs ni mi bgyid / khong rang gi lha sangs rgyas ni srog chags kun la phan pa bgyid cing / mkhan po dngos ni spyod lam bzang po / nyes so cog dang / gzhan la gnod pa'i bag mi bgyid /