[A:25] gnang chen nyung 'dus shig rgya rje'i go ru (gu ru) la bskyon nas btang bas / eg cur phyin nas / hwa shang bkug te mchis pa las / de las sgom lung dang man ngag mnos te bsgoms nas 'gro khar yang gsal snang la bya dga' ya lad rgya bye'u gser shog srang brgya pa gcig dang / dar yug lnga brgya / phra men gyi bya dang / phra men gyi gzhong pa srang brgya pa dang / mu tig sran ma tsam pa 'dom gang ba phreng bcu / za 'og 'be'u sen tsam hwan yug gcig / gzhan pas bya dga' che ba lhag par spags te bstsal nas / bod kyi btsan po'i bka' sgrom dang bstun pa'i chad byas / btsan po la skyes su dar yug khri / phra men gyi zhwa gcig / bla gor gyi sder 'dom gang pa gcig bskur / pho nya gzhan rnams la yang bya dga' che thang du gnang nas / pho nya'i lan dang chas nas slar bod yul du mchis /
bod du yang btsan pos zhang blon dag la thabs kyis bka' gros mdzad nas / spyir lha chos mdzad par chad bo dhi satwa ni da dung spyan ma drangs par gda' / sangs rgyas kyi chos mdzad par rje blon bka' gros ma thag tu / gsal snang rgya yul nas bod du slebs te btsan po'i spyan sngar skyes tsho phul nas phyag bgyis / bdag gi las grub bo ces gsol / btsan pos da bo dhi satwa spyan drongs zhes bka' btsal nas / gsal snang gis kyang bo dhi satwa spyan 'dren du bal yul du mchis pa dang / bo dhi satwas kyang padma sam bha wa dang / lha khang rtsig pa'i phywa mkhan dang gsum bal yul nas spyan drangs te bsdogs 'dug pas / mkhan po gnyis ka gsal snang gi mang yul nas rdzings bcas nas chu klung las spyan drangs nas snye mo'i thod dkar du gshegs pa dang / padma sam bha wa'i zhal nas / sang gi dro lam na nye tshe ba'i dmyal khams cig yod kyis / snying rje cig bya dgos bka' bstsal pa dang / rdzings chu la bskur nas 'u yug du gtor ma dang dgongs pa mdzad pas chab 'jam tsam du gyur /