[A:33] blon po kha gcig na re / sngags mkhan de ma bsad na de nus pa che ste / bod la byad byas par 'ong bas mdun sa nas gsod mi bco brgyad gu ru la bskyon te btang zer / dong 'phangs kyi 'phrang du dgugs (sgug) pa dang / slob dpon dpon g.yog mang yul du slebs te byon pa'i dgongs mo slob dpon gyi zhal nas sang ni 'o cag la gnod pa byed pa dang 'tshe ba byed pa cig 'ong ngo zhes skyel ma rnams la gsungs /
de nas dong 'phangs kyi 'phrang du byon pa dang / rtag snar gsod mi bco brgyad po rnams kyis la las mda' bkang / la las gri phyung / la las mdung mnan te slob dpon la rdeg par gzas pa'i tshe / slob dpon gyis phyag rgya bcings pas mi bco brgyad pos smra yang ma shes / mda' 'gengs pa bas 'gro yang ma nus te / 'jim gzugs sam gyang la bris pa bzhin du 'dug ste / 'phen ma shes par rengs pa'i nang nas gshegs ste /
de nas mang yul gyi la khar byon nas skyel ma kun brdzangs te bkye ba las / mkhan po'i zhal nas / bod khams su lha klu dang 'dre srin dam 'og tu lan gsum bcug na btsan po yang sku tshe ring / dbon sras kyang chab srid che / sangs rgyas kyi chos kyang yun ring du gnas pa zhig na 'phro lus pa yid la bcags so gsungs / chos 'khor gcig ni 'byongs nas 'ongs te / spyir sangs rgyas kyi chos gar byung bar mu stegs kyi 'gram zla re byung nas rtsod pa byed dgos pa las / bod khams su chos 'byung ba lnga brgya'i tha ma la bab pa las chos ma byung / mu stegs la sogs pa'i rgol ba ni mi 'byung na / sangs rgyas pa nyid nang rtsod pa nyid du 'gyur zhes gsungs nas nyung dkar spar gang gtad de skyel mi mar la bzlog / da re zhig nga la mi yul na gdul bya med de lho nub mtshams su srin po 'dul du 'gro gsungs ste chibs kha nas 'phur ste / sprin gyi gseb na phar chos gos spu re gseg gshang khrol le bzhud do /
de nas