[A:40] nas rdo rje gdan la bzhugs pa'i tshe yang chos kyi 'khor lo bskor bar bskul ba yang lha mos byed par 'gyur / de yang bgegs dang bar chad mi 'byung ba yang sgrol mas byed pas / sgrol ma de la gsol ba thob la bsnyen pa bgyis gcig gsungs nas / slob dpon las lung mnos nas Arya pa lo'i gling du bsgoms pas / 'phags pa rta mgrin gyis rta skad nyin lan gsum mtshan lan gsum phyung bas / rtse rgod rnams kyis thos nas bred / zhabs 'bring nang pa dang / lha khang srung ma gnyer len kun gyis thos / de ci yin dris pa dang / slob dpon na re / rgyal pos grub pa brnyes pas rta mgrin gyi rta skad lan gsum ston pa de 'dzam bu gling gsum gnyis kyi thos te rgyal po'i chab srid mnga' ris kyang de tsam du yong gsungs /
de nas yos bu'i lo la btsan po lo bcu gsum lon pa dang / dbu rtse'i rmang 'ding bar zhus pas / A tsarya na re / dpal brag dmar bsam yas mi 'gyur lhun gyis grub pa 'dzam bu'i gling na byin rlabs che ba gcig byed pas / mdo sde / 'dul ba / mngon pa ste / mtshan nyid kyi sde snod thams cad dang gsang sngags rgyud sde thams cad dang mthun zhing mi 'gal ba 'gran gyi do med pa bgyi 'tshal gsungs / A tsaryas de lta bu mkhyen tam zhus pas / ngas shes te / de lta bu gcig o tanta pu ri na'ang yod gsungs / de ci 'dra zhus pas / de ni mu stegs rig 'dzin gyi sgrub pa pos ro sgrub byed pa la / dngos grub len pa'i sgrub g.yog mtshan rtags dang ldan pa kun tu btsal bas ma brnyed pas / ma ga ta'i dge slong sgrub pa po la nye gnas gcig yod pa de de'i mtshan rtags dang ldan nas / sgrub pa po dge slong la mandal gser gyi nye'u bkram pa yang dang yang du phul bas / khyod nga la gdam ngag 'dod dam / rig 'dzin gyis smras pa / nga khyod kyi nye gnas dpa' ba'i rtags can zhu'o / des de la phul lo /