[A:42] mgon po la sa gzhi zhu ba'i gtor ma bya'o zer nas / bha lim byas pas bya rog gis khyer nas mtsho cig gi dkyil na de'u yod pa'i khar bzhag go / de'u de'i khar gtsug lag khang gcig brtsigs te ri rab gling bzhi gling phran dang bcas pa nyi ma dang zla ba dang bcas pa la dpe byas nas bzhengs pa'i gtsug lag khang o tanta pu ri bya ba yod / rgyal po chen po'i thugs dam gtsug lag khang bzhengs pa'i dpe yang de la byas na 'gran gyi do med pa sde snod gsum dang sngags rgyud sde thams cad dang mi 'gal zhing / byin rlabs yang shin tu che ba cig yong mchi bas de la dpe bya'o gsungs /
de nas gdod bal yul nas gzugs mkhan dang phyA mkhan bkug ste / sa brtag pa'i cho ga sngar bgyis pa las yang lan gcig byas pa'i tshe / gong gi tsho la shar ri has po ri nas pha bong drangs te / bzhis dbu rtse'i rmang bting / sa yar klungs gad pa thog nas blangs / shing shug pa dang tsan dan la byas te brtsigs nas / khang pa ni tshar lags / sku gzugs ji lta bu gcig bgyi dgongs pa las / btsan po mnal ba'i rmi lam du mi dkar po zhig na re / rgyal po khyod sangs rgyas kyi sku gzugs ci la bya bar sems zer / slob dpon la 'dri byas pas / mi dkar po de na re / sa gzhi 'di jo mo sgrol mas byin gyis brlabs pa yin / tA re dngos kyis zhabs kyis bcags pa yin / has po ri'i rtse mo na shAkya thub pa gtso 'khor bcu gsum sngon bcom ldan 'das nyid kyis byin gyis brlabs pa yod kyis de spyan drongs la gyis zer / de gang na yod ston dang byas pas / ba dmar 'bus 'debs pa'i sa na yod zer / 'dong zhes khrid de has po rir phyin pa dang brag kun la bltar bcug nas / 'di ni sangs rgyas dang byang chub sems dpa' 'di dang 'di zhes kun gyis mtshan yang smos nas lha bcu dgu 'dug / khro bo dang kun bstan te / rgyal po dgyes ches nas he he byas pas /