[A:54] shing mkhan dang mgar ba bkug te snyan du gsol ba'i tshe / rjes pho nya btang ste bltas pas srog shing mchod rten la btsugs pa mthong / pho nya de na re / mchod rten nyid la 'khor lo gtsugs lags zhes gsol / shing mkhan dang mgar ba kun ltar 'dong zhes phyin pas / bltas na gtsugs (btsugs) lags pa mthong ste snyan du gsol pa dang / rjes kun bsags te / nga'i 'bangs las stobs che ba 'di ni su yin / bya dga' cher gnang ngo gsungs pas / khas len pa su yang ma mchis / phywa mkhan bal po na re / mdang nga'i rmi lam na / mi bzhis 'khor lo khyer 'ongs nas btsugs / khyod kyis mchod rten bdun brtsigs na legs rab / mchod rten 'di yang legs rab / mchod rten 'di 'dzam bu gling na byin che ste / 'di la sus phyag dang skor ba byed pa de'i bsam pa yid bzhin 'grub pas / bya dga' gser gyi ya lad gcig byin te 'di khyer cig ces zer / gnyid sad tsa na mi bzhi po ni mi gda' / ya lad ni 'di yin zhes zer nas / gser khrab gcig gda' / de bzhin du btsan po'i snyan du gsol pas / phywa mkhan 'khor dang bcas pa la rgyal pos bya dga' che thang du gnang / slob dpon gyi zhal nas / de skad du ston pa rgyal po chen po bzhi yin pas / rgyal po chen po bzhi'i gzugs kyang bya gsung nas bum pa'i steng du 'bag bzhi byas nas bzhag go / de nas mgon khang bzhi'i nang du phugs na shAkya mu ne gtso 'khor gsum / mdo na mgon po lcam dral gnyis / de'i sgo dra ba byas / sgo'i phyi na rta bab dang / steng na chos kyi 'khor lo gser las byas pa / sha ra na dang / gdugs rgyan dang bcas pa bgyis te / chos skyong rgyal po bzhi la gtad / lcags ri'i zur mang rdo rje 'gros la mchod rten brgya rtsa brgyad kyi tshul du bskor nas / re re la sangs rgyas kyi ring bsrel re bzhugs pa chos skyong rgyal po sde bcwa brgyad la gtad / bsam yas phyi'i chos skyong dpal mgon po la gtad do /