[A:58] byed pa med pas / btsan po thubs ma bde nas 'bangs rnams la chos bya bar rigs so zhes gsungs nas / de nas yos kyi lo'i dpyid zla ra ba'i ngo la / slob dpon gyis thams cad yod par smra ba'i sde / dbus pa bye brag tu smra ba bya ba'i dge slong bcu gnyis spyan drangs nas / zhang blon gyi bu tsha mchims legs {bzang} la sogs pa la slob dpon gyis rgya gar skad bslabs pa las / mchims a nu'i bu shAkya dang / pa gor na 'dod {he 'dod kyang zer} kyi bu pa gor bai ro tsa na dang / sba rma gzigs {khri bzher yang zer} kyi bu ratnar / sba khri bzher gyi bu sang shi ta yang zer ba de dang / zhang nya bzang gi bu lha bu dang / lha bse btsan dang / shud pu khong sleb la sogs kyis skad lobs / mchims legs bzang la sogs pa zhang blon gyi bu tsha gzhan mang zhig gis ni skad ma shes so /
blon po 'gos rgan na re / nged blon po rgan po rnams la long ma mchis pas a tsa ra'i skad lob mi khom pas rgan po'i chos zhu zer bas / slob dpon gyis a pha dang / a ma'i skad don thog du phebs te / don la rgya skad dang mthun par bod skad mkhyen zhing byang ba dang / bod skad du chos bshad pas sam skri ta'i skad ma dgos pas / slob dpon gyi zhal nas / bod byang chub sems dpa'i sprul pa'i skad yin pas chos byar btub po gsung bas / btsan po'i zhal nas / slob dpon nga'i bod la dge slong med pas nga'i zhang blon dag la dge slong btub bam ces zhus pa'i lan du / btub bam sad par bya gsungs nas skad lobs pa tsho las thog mar bod la dad pa che ba'i sba {sang shi ta yang zer} khri gzigs dge slong byas ma thag tu mtshan sba dpal dbyangs su btabs / mngon par shes pa lnga dang ldan pas / btsan po dgyes te de'i zhabs spyi bor blangs te khyod bod kyi rin po che yin no zhes bka' bstsal nas mtshan kyang sba ratna zhes btags te / bod kyi rab tu byung ba la snga ba de yin no /
btsan po na re / slob dpon