[A:62] bsgyur ba las / chos dpe thams cad dpal shrI na lendra na yod pa mes tshig der ma tshang bar yod pa shas cig ma bsgyur bar yod pa nga'i yid la bcags so gsungs / de tshe nus pa yod pa kun gyis bka'i rgya dpe rnyed tshad bsgyur ro / 'tsho ba thams cad bla chen po nas sbyar te / tshang mang ke ru gling nas g.yos pa byas te rab tu byung ba sum brgya la zas sna bcu gsum 'dren pa'i lag dpon jo mo byang chub rjes mdzad / gdan non pa dang / rgyas pa'i bam po re la shog dril re byas nas 'don te / na ma re la 'bum tsho re bka' sgrags so / dus der blon po 'gos kyi mchid nas / chos ni rgyas par mdzad lags te / da skye bo mi chos kyi lo rgyus kyi bya ba ci gnang / zhes zhus pas / rje'i gdung rabs dang / 'bangs kyi sa bcad dang / dkon mchog la phyag mchod dang / ya rabs la zhe sa / gtam dang lo rgyus / bzang po'i las thabs dang / lag rjes dang / pha mes kyi dge dang yig tshang gi lugs rgyas par bya bar gnang go /
de dus ring zhig na mkhan po bo dhi satwa pho brang rim dgu'i 'og khang du dbu la rtas phrab (phra) rgyab ste zhal chems ye shes dbang po la bzhag te sku gshegs / de'i spur khang has po ri'i rgyab du bzhugs nas mchod rten cig kyang bzhengs / der btsan pos ye shes dbang po ring lugs su bskos so /
slad kyi ye shes dbang po mngon par shes pa dang yang ldan / nged rje 'bangs kyi dge ba'i bshes gnyen lags pas / sangs rgyas kyi zhal dang 'dra bas mdun sa yang bcom ldan 'das kyi ring lugs su bkas bskos te bla ma'i gong du bton / chos kyi bka' la btags / thabs yig tshangs gser gyi yi ge chung ngu byin nas gral yang zhang blon chen po'i gong du 'dug cig / lha chos kyi mdun sa yang mdun sa chung ngu'i gong du phul la / springs pa yang bcom ldan 'das kyi ring lugs gyis / zhang blon chen po'i mdun sa chung ngu na gsol ba gyis shig /