[A:66] zhes lo rgyus zhib tu gsungs nas da ji ltar bya zhes gsungs /
ye shes dbang pos gsol ba / de la bdag 'dir dgug mi 'tshal / bdag 'dir ma mchis te sgom pa'i bar chad ma byung na / lha sras kyi sku tshe dang / bdag gi tshe yang yun ring du gnas / lha chos kyang byams pa gshegs kyi bar du gnas par 'gyur ba zhig na / bod la skal ba ma mchis pas lan / mkhan po 'da' khar 'di skad gsungs te / yong ni sangs rgyas kyi bstan pa gar byung bar mu stegs kyi rgol ba'i dgra re 'gran du 'ong ba yang 'byung rgyu yin na / bod yul du bstan pa lnga brgya'i tha ma la byung bas / mu stegs kyi rgol ba ni mi 'byung / sangs rgyas pa nyid lta ba ma mthun te rtsod par 'gyur gyis / de lta bu byung na / nga'i slob ma kA ma la shi la bya ba cig bal yul na 'dug pa spyan drongs la / de dang shags 'gyed du chug la / rgyal pos brdums (bsdum) gyis shig / rtsod pa chos phyogs su 'dum par 'gyur ro / zhes mkhan po 'da' khar gsungs / de yang de ltar mdzad du bas zhes gsol nas / btsan po kA ma la shi la 'gugs su bal yul du pho nya btang ba dang / ston min pa dpon g.yog sum brgyas shes rab 'bum blangs te bsam gtan gling sgo bcad de zla ba bzhi'i bar du shags bslabs / dgongs pa nges par 'grel pa ni rdog pas dril te chos min zer nas bor / de'i tshe kA ma la ma byon gyi bar du ye shes dbang pos lwa shang gi lta ba dang / bo dhi satwa'i lta ba dang / rtse min gyi lta ba ji ltar lags pa ril snyan du gsol ba las / lha sras kyi dgongs pa yang 'khrol te dgyes ches nas / dbu btud te ye shes dbang po ni nga'i A tsarya'o zhes yang yang gsungs te / ye shes dbang po'i zhabs la phyag btsal nas bka' bstsal ba'i rjes la / dus phyis kA ma la shI la rlung tshugs la thon zhes pho nya ba byung ste rje blon yos (yongs) chab khar bsu ba la byon pas / hwa shang 'khor dang bcas pa yang chab khar byon /