chos spyod rnam bcu spyod pa ni skye bo dge ba'i 'phro med pa / blo zhan pa / dbang po btul po rnams la bstan pa yin / sngon blo sbyangs pa dbang po rnon po dag la sprin dkar nag gnyis gang gis kyang nyi ma sgrib pa ltar / dge sdig gnyis kas kyang sgrib pas / de bas na ci la yang mi sems / ci la yang mi rtog / ci yang mi spyod pa ni mi dmigs pa gcig char 'jug pas sa bcu pa dang 'dra'o / ces gsungs pa dang /
A tsarya kA ma las smras pa / de ltar ci yang mi bsam zer ba ni so sor rtog pa'i shes rabs spangs pa yin no / chos thams cad kyi rang bzhin chos dbyings rnam par mi rtog pa de ni so sor rtog pa'i shes rab kyis rtogs dgos pa yin / yang dag pa'i ye shes kyi rtsa ba ni so sor rtog pa'i shes rab yin na / de spangs pas 'jig rten las 'das pa'i ye shes sam shes rab kyang spangs par 'gyur na / so sor rtog pa'i shes rab med par rnal 'byor pas thabs gang gis rnam par mi rtog pa la gnas par 'gyur / gal te chos thams cad dran pa med cing yid la byar med pa yin na / nyams su myong ba thams cad mi dran zhing yid la bya bar mi nus so / gal te bdag gis chos gang yang dran par mi bya / yid la mi bya'o snyam na ni / de nyid dran pa shin tu yid la byas par 'gyur ro / dran pa dang yid la bya ba med pa tsam la bya skad na / de gnyis dpyad dgos te / med pa ni rgyur mi rung ste / dran pa med pa tsam gyis rnam par mi rtog par 'gyur na / brgyal ba dang / ra ro ba dang / bog pa'i dus su yang dran pa med pas rnam par grol bar 'gyur ro / de lta bas na yang dag pa'i so sor rtog pa med par rnam par mi rtog par 'jug pa'i thabs med do / dran pa tsam po bkag kyang yang dag pa'i so sor rtog pa med na / chos thams cad ngo bo nyid med pa la ji ltar 'jug nus / ngo bo nyid med pa stong pa nyid ma rtogs na sgrib pa spong bar mi 'gyur ba kho na'o / stong pa nyid ma rtogs kyang dran pa med pa tsam gyis thar pa dang grol bar 'gyur na khams gong ma'i lha thams cad thar par 'gyur ba'o / dran pa ci yang med pa'i rmongs pa'i sems kyis yang dag pa'i lam rnal 'byor du ji ltar 'gyur / de ni gnyid 'thug po'am / glen pa'i sems dang 'dra'o / dran bzhin du yang mi dran byar mi rung ngo / dran med yid la byar med pas sngon gyi gnas rjes su dran pa dang / thams cad mkhyen pa ji ltar 'gyur / nyon mongs pa yang ji ltar spong / de bas na yang dag pa'i so sor rtog pa'i shes rab kyis phyin ci log gi snang ba rgyang bsrings pa yin no / de rgyang bsrings shing spangs pas yang dag pa