[A:71] gom pa gcig gis bgrod mi nus pa ltar sa dang po thob pa yang rab tu dka' na / thams cad mkhyen pa thob pa lta ci smos / ci yang ma byas par sangs rgyas pa ni khyed la bstan pa'i khungs dgos / ston rtsen mi 'dra ste / nged brtse min la gsung rabs kun bslabs / thos bsam sgom gsum gyi shes rab rnam gsum la brten nas don ma nor bar shes te chos spyod rnam bcu la bslabs te bsgoms pas / sa dang po la bzod pa yang thob / yang dag pa'i skyon med par yang 'jug / de nas sa dgur yang dag pa'i shes rab kyis rim par sbyangs / pha rol tu phyin pa bcu la bslabs / rgyud sbyangs tshogs gnyis rdzogs nas sangs rgyas gnyes (brnyes) pa lags na / khyed ltar tshogs gnyis ma bsags blo ma sbyangs par 'jig rten byi bya ba yang mi shes na thams cad mkhyen pa thob pa dang rig pa dang shes bya thams cad la 'jug pa ji ltar 'gyur / sangs rgyas rang gzhan gyi don phun sum tshogs pa de'i rgyu ci las grub na tshogs gnyis las grub pa yin / stong pa gcig pus rang la yang mi phan na gzhan gyi don lta ga la grub / tha na lus srog 'tsho ba la'ang zas dang skom dang gos la sogs pa rtsol grub byas pa la brten te 'tsho dgos na / de dag la ma brten na sogs pa rtsol grub byas pa la brten te 'tsho dgos na / de dag la ma brten na 'gum ste / zas ma myong na zhag bdun na ltogs te 'chi na / thar pa sgrub pa la chos spyod rnam bcu bya dgos pa lta ci smos / de ltar khungs med cing thabs shes rab ya bral ba'i chos kyis sangs rgyas la bkur te bslus pa yin / byang chub sems dpa' ni sems can gyi don du sems bskyed nas / gzhan don lhur byas nas bsod nams kyi tshogs bsags te / shes bya thams cad la mkhas par bslabs / shes rab gsum la blo sbyangs te ye shes kyi tshogs bsags / sgrib pa gnyis sbyangs / blo'i dri ma thams cad spangs nas mthu rdzogs pa dang sangs rgyas nas sems can thams cad sangs rgyas kyi sa la 'god par mdzad pa'i 'phrin las 'khor ba ma gtongs (stongs) kyi bar du 'byung ba lhun gyis grub pa yin par lung du ma nas gsungs so /