[A:78] nub mo sgra bsgyur gyi gzims mal du mkhal ma mnyes nas bkrongs / phyis sba [dpal dbyangs] sang shi 'da' khar jo bo yid bzhin 'khor lo bsgyur ba'i sku gzugs kyi lha'i spyan nas spyan chab byung / ye shes dbang po 'da' khar mi ma yin pa dag gis bsu ba'i sgra byung / nam mkha' las mchod pa dag kyang byung / 'phags pa la ye shes dbang po the tshom zhu zhing mchis pa'i drung du btsan po gshegs nas 'bras thug drags te gsol nas / ye shes dbang po'i zhal nas / rje lha gcig gi pham phab 'di 'tshal nas deng slan chad khams kyi zas spangs so / ting nge 'dzin dang zas su brje'o / phung po zas su brje'o / zhes mchi nas sku gshegs so /
grongs pa'i dus su nam mkha' nas sgra byung / bya thams cad gdung ba'i skad 'don / btsan po'i zhal nas / A tsarya chen po tshe 'da' ba dang sbyar na kho bo'i tshes kyang ring por mi thub bo zhes gsungs /
yang btsan po'i zhal nas / bar du ston min gyi tshig nyan te / chos slab cing dharma'i dpe len du yang mi kun ma btub / rgya gar gyi dharma'i dpe thog yid la ma bcags pa tsam blangs te bsgyur zin na / shrI na lentrar rgya gar gyi dharmA mes tshig ste ma tshang ba / rgya yul du chos byung nas lo stong nyis brgya lon te / gsung rab kyi dpe tshang bar bzhugs na / rgya'i dharma ma bsgyur ba yid la bcags so zhes gsung nas thugs ngal mdzad /
dge 'dun la chos slob kyi grwa gzugs par bgyis pa las / ye shes dbang po tshe las 'das nas slad kyis bu mo spyan ras gzigs kyis jo mo khro legs la chos slob kyi grwa gzugs par gsol ba dang / jo mos btsan po lha sras kyi snyan du gsol ste / btsan pos chos slob kyi grwa btsugs / sras mo spyan ras gzigs ['di sba gsal snang gi bu mo yin] kyis rje 'bangs mi mang po'i bsod nams su brag dmar ma sa gong du mchod rten brgya rtsa brgyad brtsigs / mchod rten ma tshang bar du chu mig dang sa bzang po klus btang /