[A:B-72] li spyod pa'i rgyal po lam du gum kyang mgo btsan po'i phyag tu phul gcig ces / bu li gser gzung / li gser 'od / li gser tog gsum bod du bzo byed du sdzangs / pho nya la skyes bskur nas yar 'ong / li spyod pa'i rgyal po ma gum bar btsan po dang zhal mjal / 'dzam bu gling na rdo bzo mkhas pa bal po rdo mkhan la sogs pas bzo bgyis te / 'og khang gsum sgo'i rib cha yan chad man chad rdo la byas te / rdo bzo khyad par 'phags te / phud ra sa'i gtsug lag khang du mes kyi chos srol gtod pas bka' drin che bas / rdo ring rdo rje'i tshul du phul / ri mo'i phud di dar gyi be brum brgya rtsa brgyad phul / lder tsho'i phud du tshangs pa dang rgyal byin [brgya byin] gnyis bzhengs su gsol / lugs ma'i phud cong chen po dril bu'i tshul du phul / bar khang gsum so phag las byas / steng khang gsum shing dang zangs dang ko ba la byas te / dgu thog tu byas / rgya phibs kyi 'og nas phar rlung gis 'khor los bskor te / rab tu byung ba mang po skor ba byed / bya 'dab las phyogs bzhir lcags thags bzhis mchod rten chen po bzhi la bstod / rlung chen po nub nas langs pa'i tshe / shar gyi lcags thags lhod la rgya phibs shar du yo tsam 'gro / rlung shar nas langs na nub kyi lcags thag lhod la / rgya phibs nub to yo 'gro ba / ri nag gi rtse la na bun byung ba dang / lha khang gi khyung mgo la'ang 'ong ba'i mthon po gcig bzhengs su gsol / 'bangs bde ba la 'god pa yang zas dang gos tsam gyis bde ba ni 'phral du bde bar bsal / yun du bde ba'i lha chos la 'god pa'i phyir de bzhin gshegs pa'i glegs bam chib par gzigs pas /