[A:2a]/ /skyes su btags so// des srin po skye reng khrag med bya ba la/ chung ma g.ya' 'brum si li ma bya ba yod pa las/ srin po skya reng khrag med bsad/ g.ya' 'brum si li ma khab tu bzhes pa las/ sras gcig 'khrungs pa ni/ srin po dang 'khon pa'i bar du byung pas/ ming yang 'khon dbar skyes su btags so/ de phyin chad 'khon zhes su grags so/ des btsan za lcam bu smon khab tu bzhes pas/ sras gcig 'khrungs te/ mthu dang rdzu 'phrul che ba/ blo dang rig pa ldan pa/ gzugs dang lang tsho 'dzoms pa/ mthong ba tsam gyis yid 'phrog pa/ shin tu mdzes pa gcig byung bas/ 'di 'dra mi yul du dkon zer nas/ dkon pa rje gung stag tu grags so// khye'u de yab kyis yul gang bzang ltar btang pas/ la stod gnyan rtse thangs kyi ya changs la yul gyi dge brgyad 'dzoms par mthong ste/ de yang mtsho chen mtsho mo ni zhing chu dang/ btung chur bzang zhing/ thang chen thang phung ni/ zhing sa dang khang sar bzang/ sags dgun bu dgun smug ni/ khang shing dang 'bud shing du bzang/ phar ya changs ni gam 'brog dang rgyang 'brog tu bzang par gzigs te/ yul de bzung ngo/ de dus bod na rgyal po khri srong lde btsan bzhugs pa'i sku ring la/ za hor gyi mkhan po zhi ba mtsho gdan drangs/