[A:1b] lha'i gdung rabs/ 'khon gyi gdung rabs/ sa skya 'khon gyi gdung rabs so/ dang po lha'i gdung rabs ni/ de yang gnam gyi lha mched gsum byung ba'i/ che ba gnam lha spyi rings/ bar pa g.yu rings/ chung ba gnam lha dbu se bya ba yin no// de rnams la mi rje zhus pas/ gnam lha dbu se byon nas mi rje mdzad/ de la sras bzhi byung ste/ se byi le spun bzhir grags/ de rnams kyis ldong rus chen bco brgyad dang 'thab pa'i grogs la/ gnam lha g.yu rings byon/ ldong rus chen bco brgyad btul nas bran du byas/ de nas gnam lha g.yu rings kyi dmu'i bu mo dmu sa ldog bu khab tu bzhes pa las sras bdun byung ba la/ ma sangs spun bdun du grags/ de'i gcen drug yab dang bcas pa lha yul du gshegs/ chung shos ma sangs spyi rje zhes bya bas/ thog la 'od chen gyi bu mo thog lcam 'ur mo khab tu bzhes pa'i sras thog tsha dpa' bo stag/ des klu'i bu mo klu lcam bra ma khab tu bzhes pa'i sras klu tsha rta po 'od can/ des mon za mtsho mo rgyal khab tu bzhes pa'i sras g.ya' dang spang gi mtshams su skyes pas/ ming g.ya' spang skyes su btags so/ de rnams la lha'i gdung rabs lnga zer ro// gnyis pa 'khon gyi gdung rabs ni/ g.ya' spang skyes kyis srin po skya rengs khrag med bsad/ de'i chung ma g.ya' 'brum si le ma 'phrogs nas khab tu bzhes pa la sras gcig skyes pa ni srin po dang/ 'khon pa'i bar du byung bas/ ming yang 'khon bar skyes su btags/ de phyin chad 'khon zhes grags so/ des btsan za lcam bu smon khab tu bzhes pa las sras gcig 'khrungs pa de mthu dang rdzu 'phrul che ba/ mthong ba tsam gyi yid 'phrog pa gcig byung bas 'di 'dra mi yul du dkon zer nas dkon pa rje gung stags so// khye'u de yab kyi yul gang bzang ltar snang bas/ la stod gnyan rtse thar gyi yang bcangs la/ yul gyi dge brgyad tshar bar mthong ste yul de bzungs/ dkon pa rje gung stag 'di blo gros che zhing 'jig rten gyi bya ba la mkhas pas/ rgyal po'i nang rje ba yun ring du byas pa'i dus na/ 'khon dpal po che zhes grags so// des glang kham lo tsA bkod lcam mo/ bla za ne chung ma bya ba khab tu bzhes pa la sras bzhi byung ba'i