[B:2a]རྩེའི་ཀློག་ཕྲེང་གསར་པས་མཁའ་ངོས་འགེངས། །ལེགས་བཤད་སྙན་པའི་འབྲུག་
[A:3]སྒྲས་ས་གསུམ་བསྐྱོད། །ཕུན་ཚོགས་དཔལ་འབྱོར་ཆར་ཆེན་གཡོས་པ་ཡིས། །ཕན་བདེའི་སྐྱེད་ཚལ་མཐའ་དག་རྒྱས་མཛད་པས། །ས་སྟེང་འདི་ན་འགྲན་ཟླ་བྲལ་ལོ་ཞེས། །ཤར་ཕྱོགས་རྒྱ་མཚོའི་མཐས་བཏུགས་སྐྱེ་རྒུ་ཡིས༑ །ཞབས་པད་སྤྱི་བོར་བསླངས་པའི་ས་སྐྱ་པ། །དྲི་མེད་འཁོན་གྱི་གདུང་བརྒྱུད་རིམ་པ་ལ། །སྒོ་གསུམ་གུས་པ་ཆེན་པོ་ཕྱག་བཙལ་ནས། །དེ་ཡི་གདུང་རབས་རྣམ་པར་ཐར་པ་རྣམས། །འདུས་གསལ་གོ་བདེར་འཆད་ལ་སྤྲོ་བར་གྱུར། །ལ་ལས་ཡོན་ཏན་ཡོད་ཀྱང་རྗོད་མི་ཤེས། །ཁ་ཅིག་རྗོད་ཚུལ་མཁས་ཀྱང་བརྗོད་བྱས་སྟོངས། །དེང་འདིར་བརྗོད་བྱ་རྗོད་བྱེད་མཚུངས་བྲལ་ཕྱིར། །མཁས་རྨོངས་མཐའ་དག་དགའ་བ་ཅིས་མི་སྐྱེ། །དེ་ཡང་ཐོག་མར་གླེང་བསླང་ཞིང་འབྲེལ་བཙལ་བའི་ཕྱིར་དུ་སངས་རྒྱས་ཀྱི་བསྟན་པའི་གནས་ཚད། དེ་ལས་སྔར་འདས་ལྷག་ལུས་ཀྱི་རྣམ་གཞག་བསྟན་རྩིས་སུ་གྲགས་པ་བརྗོད་པར་རིགས་པ་ལས། རྒྱས་པར་གཞན་དུ་རྗོད་ཟིན་པས་འདིར་མདོར་བསྡུས་ཤིག་རྗོད་ན། གནས་ཚད་ནི་མདོ་སྡེ་གཞན་དུལོ་སྟོང་དང་༑ ཕྱེད་དང་ཉིས་སྟོང་དང་། སུམ་སྟོང་སོགས་སུ་བཤད་པ་ཡོད་ཀྱང་། རྟོགས་པའི་བསྟན་པ་དང་། བསྟན་པ་ཡོངས་རྫོགས་ལ་